Բակօ Սահակեան «Քորոնա» Ժահրի Կանխարգիլման Աշխատանքներուն Նուիրուած Խորհրդակցութիւն Հրաւիրած է
Արցախի Հանրապետութեան նախագահ Բակօ Սահակեան, Փետրուար 27-ին, հրաւիրած է աշխատանքային խորհրդակցութիւն՝ նուիրուած հանրապետութեան մէջ «քորոնա» ժահրի տարածման կանխարգիլման ուղղուած աշխատանքներուն: Այս մասին կը յայտնեն Արցախի Հանրապետութեան նախագահի աշխատակազմի տեղեկատւութեան գլխաւոր վարչութենէն:
Զեկոյցներով հանդէս եկած են խորհրդակցութեան մասնակցող առողջապահութեան եւ միւս համապատասխան ոլորտներու ղեկավարները՝ անդրադառնալով հանրապետութեան մէջ վարակի տարածման կանխարգիլման նպատակով իրականացուող եւ նախատեսուող աշխատանքներուն:
Նախագահ Սահակեան կարեւոր համարած է այս ուղղութեամբ բոլոր անհրաժեշտ քայլերու իրականացումը եւ յանձնարարականներ տուած շահագրգռուած մարմիններու պատասխանատուներուն:
Խորհրդակցութեան ընթացքին երկրի ղեկավարը անդրադարձած է նաեւ Արցախի Հանրապետութեան նախագահի եւ Ազգային ժողովի ընտրութիւններու նախընտրական քարոզարշաւի մեկնարկին:
Նախագահը ընդգծած է, որ այս ընտրութիւնները ունին չափազանց կարեւոր համապետական նշանակութիւն եւ, ինչպէս բոլոր անցեալ ընտրութիւնները, պէտք է ըլլան ժողովրդավարական, բաց ու թափանցիկ, օրէնքի տառին ու ոգիին համապատասխան, անցնին փոխադարձ յարգանքի եւ հանդուրժողականութեան մթնոլորտի մէջ: Բոլոր պետական մարմինները իրենց պատասխանատւութեան ծիրէն ներս պէտք է ապահովեն ընտրութիւններու պատշաճ մակարդակով իրականացումը:
Խորհրդակցութեան մասնակցած են Արցախի Հանրապետութեան պետական նախարար Գրիգորի Մարտիրոսեան, Անվտանգութեան խորհուրդի քարտուղար Արշաւիր Ղարամեան եւ պաշտօնատար այլ անձեր: