Սերգէյ Խաչատրեան Ճանչցուած է Աշխարհի Լաւագոյն Երիտասարդ Երաժիշտ
Համաշխարհային ճանաչում ձեռք բերած հայ ջութակահար Սերգէյ Խաչատրեան ստացած է զուիցերիական Credit Swiss դրամատան ամենամեայ մրցանակը` ճանչցուելով «Աշխարհի լաւագոյն երիտասարդ երաժիշտ»: Այս մասին կը հաղորդէ Armenpress.am-ը՝ վկայակոչելով novostink.ru կայքը։
Ջութակահարը պարգեւատրելու արարողութիւնը տեղի ունեցած է Վիեննայի մէջ, Յունուար 18-ին: Ժիւրիի կազմը գլխաւորած է Լիւցեռնի փառատօնի գեղարուեստական ղեկավար Միխայիլ Կաֆլիկերը:
Միաժամանակ Սերգէյ Խաչատրեան արժանացած է նաեւ մրցանակի` զուիցերիական 75 հազար ֆրանկ գումարի չափով, որ երաժշտական բնագաւառի մէջ «ամենասուղ» մրցանակներէն մէկն է: Մրցանակը նաեւ կ՝ենթադրէ, որ ջութակահարը պիտի մասնակցի Վիեննայի ֆիլհարմոնիկ նուագախումբին հետ համերգի: Անիկա Կուսդաւօ Տուտամելիայի ղեկավարութեամբ պիտի կայանայ Սեպտեմբեր 13-ին: Google+ համակարգին մէջ զուիցերիական դրամատան վերջին հրապարակային գրուածքը կը վերաբերի հայ երիտասարդ երաժիշտին. զայն շնորհաւորած են յաջողութեան ու կոչման արժանանալու համար:
Սերգէյ Խաչատրեանի վերջին համերգը Երեւանի մէջ կայացած է 2013 Սեպտեմբեր 15-ին, երբ ան «Արամ Խաչատրեան» համերգասրահին մէջ հանդէս եկաւ Հայաստանի պետական երիտասարդական նուագախումբին հետ: Սերգէյ Խաչատրեան կը նուագէ 1740-ին Ճ.Կուարներիի ստեղծած «Իզա»-ի ջութակով, որ անոր սիրով տրամադրած է ճափոնական Nippon երաժշտական հիմնադրամը: Համերգի նախօրէին հրաւիրուած ասուլիսին՝ Խաչատրեան խոստովանած էր, որ սեփական ժողովուրդին համար նուագելը իւրայատուկ զգացողութիւն է, որ այլ բեմերու վրայ հնարաւոր չէ ապրիլ։