Յունաստանի Նախագահը Յարգանքի Տուրք Մատուցեց Հայոց Ցեղասպանութեան Զոհերու Յիշատակին
Յունաստանի նախագահ Փրոքոփիս Փաւլոփուլոս (Prokopis Pavlopoulos) Նոյեմբեր 5-ին այցելեց Ծիծեռնակաբերդի յուշահամալիր եւ յարգանքի տուրք մատուցեց Հայոց Ցեղասպանութեան զոհերու յիշատակին: Ինչպէս կը տեղեկացնէ «Արմենփրես»-ը, Յունաստանի նախագահին կ՛ուղեկցէին Շրջակայ միջավայրի նախարար Էրիկ Գրիգորեան եւ Երեւանի քաղաքապետի տեղակալ Հայկ Սարգսեան:
Հայոց Ցեղասպանութեան թանգարան-հիմնարկի տնօրէն Յարութիւն Մարութեան նախագահ Փաւլոփուլոսին ներկայացուց Հայոց Ցեղասպանութեան զոհերու յիշատակը յաւերժացնող Ծիծեռնակաբերդի յուշահամալիրի ստեղծման պատմութիւնը: Յունաստանի նախագահը նաեւ շրջայց կատարեց թանգարանին մէջ, գրեց թանգարանի յուշամատեանին մէջ:
Հայոց Ցեղասպանութեան յիշողութիւնը պէտք է պահպանուի, չէ որ եթէ ցեղասպանութիւնները մոռցուին, այդ յանցագործութիւնները նորէն կը կրկնուին: Սա ուղերձ է Երեւանէն բոլորին: Կը տեսնենք, որ աշխարհի մէջ նման իրադարձութիւնները կը կրկնուին, եւ կան անձիք, որոնք թշնամի են մարդուն եւ քաղաքակրթութեան: Մենք վերապրած ենք նոյն սարսափը, ինչպէս հայերը: Շատ շնորհակալ եմ Հայաստանի Հանրապետութեան նախագահին եւ կառավարութեան մեզ հիւրընկալելու համար, որովհետեւ հայ-յունական յարաբերութիւնները երկար տարիներու պատմութիւն ունին, եւ մենք պէտք է պահպանենք այս ընդհանուր յիշողութիւնը»,- լրագրողներուն յայտնեց Յունաստանի նախագահը:
Այնուհետեւ Փաւլոփուլոս Ծիծեռնակաբերդի ծառուղին մէջ խորհրդանշական եղեւնի տնկեց:
1996-ի Ապրիլ 25-ին Յունաստանի խորհրդարանը ճանչցաւ Հայոց Ցեղասպանութիւնը, իսկ 2014-ի Սեպտեմբեր 9-ին՝ ընդունեց ցեղասպանութեան ժխտումը քրէականացնող օրինագիծը: