Երեւանի Մէջ Բացուեցաւ ՀՄԸՄ-ի Հիմնադիր Շաւարշ Քրիսեանի Կիսանդրին
Հայաստանի մարմնամարզութեան պետական հիմնարկի (ֆիզիկական կուլտուրայի եւ սպորտի պետական ինստիտուտի) գլխաւոր շէնքին կից բացուեցաւ 1915 թուականի թրքական ճնշումներուն զոհ գացած պոլսահայ մարզիկ Շաւարշ Քրիսեանի կիսանդրին:
«Արմենփրես»-ի հաղորդմամբ` բացման հանդիսաւոր արարողութեան ներկայ էին հիմնարկի ուսանողներ, դասախօսական կազմը, ՀՄԸՄ-ի Հայաստանի եւ սփիւռքի թեւերու ներկայացուցիչներ: Ողջոյնի խօսքին մէջ՝ հիմնարկի տնօրէնի պաշտօնակատար Դաւիթ Խիթարեան ընդգծեց Քրիսեանի` հայկական մարմնակրթական շարժման մէջ ունեցած անգնահատելի դերը: «Եթէ Փիեր տը Քուպերտէն իր մեծ աւանդը ունի ժամանակակից Ոլիմպիական խաղերու կայացման գործին մէջ, ապա նոյնատիպ մեծ աշխատանք տարած է հայկական մարմնամարկրթութեան զարգացման մէջ Շաւարշ Քրիսեանը»,- ըսաւ տնօրէնի պաշտօնակատարը:
Մարմնամարզութեան պետական հիմնարկի մարզական լրագրութեան եւ ճատրակի ամպիոնի նախաձեռնութեամբ կազմակերպուած կիսանդրիի բացման ներկայ էր նաեւ Շաւարշ Քրիսեանի եղբօր թոռնիկը, որ կը կրէ մեծանուն ազգականին անունը: Շաւարշ Քրիսեան կրտսերը շեշտեց, որ մարմնամարզութեան միջոցով պէտք է յայտնի դարձնել Հայաստանը:
Ամբիոնի վարիչ Ռոլանդ Շառոյեան փաստեց, որ Քրիսեան հայկական մարմնակրթութեան հիմնադիրն է` հոգեւոր հայրը: «Կ՛անցնին հարիւրաւոր տարիներ, բայց Շաւարշ Քրիսեանի գաղափարները կը մնան մեր երիտասարդ սերունդներուն մէջ»,-ըսաւ ան:
Նոյն հիմնարկին մէջ կայ նաեւ Քրիսեանի անուան լսարան:
Շաւարշ Քրիսեան 1905-ին աւարտած է Փարիզի մարմնամարզական դասընթացները: 1905-էն աշխատած է Կ․ Պոլսոյ հայկական վարժարաններու մէջ, 1911-1915 թուականներուն հիմնադրած եւ խմբագրած է հայկական «Մարմնամարզ» մարզական թերթը: 1914-ին հիմնադրած է Հայ Մարմնամարզական Ընդհանուր Միութիւնը (ՀՄԸՄ): Անոր նախաձեռնութեամբ Կ․Պոլսոյ մէջ տեղի ունեցած են հայկական առաջին Ոլիմպիական խաղերը: