«Լեւոն Շանթ. Մարդը Եւ Գործը». Հրապարակի Վրայ է Համազգային Հայ Կրթական Եւ Մշակութային Միութեան Մեծարժէք Գիրքը
Համազգային Հայ կրթական եւ մշակութային միութիւնը, հաւատարիմ մնալով իր կոչումին, ընթերցասէր լայն հասարակութեան կը ներկայացնէ «Լեւոն Շանթ. մարդը եւ գործը» հատորեակը` նուիրուած Լեւոն Շանթի 150-ամեակին: Գիրքին մէջ տեղ գտած նիւթերուն մեծ մասը առաջին անգամ կը տպագրուի Հայաստանի մէջ, որ աւելի հետաքրքրական պահեր կը պարգեւէ ընթերցողին:
Մեծ մտաւորականին` հայ կեանքի ու յատկապէս կրթութեան եւ մշակոյթի անդաստանին մէջ իր անջնջելի դրոշմը ձգած Լեւոն Շանթի հոգեւոր ժառանգութիւնը հասկնալի պատճառներով արգելքի տակ էր Խորհրդային տարիներուն: Խոստովանինք, որ վերանկախացումէն ետք ալ լիարժէք չէ քարոզուած…
«Լեւոն Շանթ. մարդը եւ գործը» գիրքը ծնունդ առաւ համազգայինի ու անոր մտաւորական բարեկամներու ջանքերով: Գիրքին մէջ կը հանդիպիք հետաքրքրական ու նուիրական անուններու ․ Սիմոն Վրացեան, Նիկոլ Աղբալեան, Կարօ Սասունի, Յակոբ Օշական, Մուշեղ Իշխան, Անդրանիկ Ծառուկեան…, որոնց յուշագրական նօթերն ու բնութագրական դիտարկումները իւրայատուկ արժէք կը հաղորդեն գիրքին:
Բարի վայելում:
