Հայաստան Կը Մասնակցի Ուաշինկթընի Կրօնական Ազատութիւններուն Նուիրուած Համաժողովին
Ուաշինկթընի մէջ շուրջ հարիւր երկիրներու արտաքին գործոց նախարարներ՝ կրօնական հետապնդումներ եւ յարձակումներ վերապրածներու հետ միասին, կը մասնակցին Կրօնական ազատութիւններուն նուիրուած համաժողովին: Մասնակիցներուն շարքին է նաեւ Հայաստանի արտաքին գործոց նախարար Զոհրապ Մնացականեան: Ինչպէս կը հաղորդէ «Արմենփրես»-ը` Հայաստանի արտաքին գերատեսչութեան ղեկավարը հանդէս պիտի գայ ելոյթով:
Յուլիս 17-ին Զոհրապ Մնացականեան հանդիպում ունեցած է ԱՄՆ արտաքին գործոց նախարարի եւրոպական եւ եւրասիական հարցերով տեղակալ Ֆիլիփ Ռիքերի հետ։ Անոնք քննարկած են ԱՄՆ ու Հայաստանի միջեւ յարաբերութիւնները, ինչպէս նաեւ կրօնական փոքրամասնութիւններու` մասնաւորապէս Մերձաւոր Արեւելքի քրիստոնեաներու պաշտպանութեան հետ կապուած հարցեր:
ԱՄՆ ԱԳ նախարար Մայք Փոմփէօ եւ կրօնական ազատութիւններու հարցերով ԱՄՆ դեսպան Սեմ Պրաունպէք ընդգծած են, որ Ուաշինկթընի կրօնական ազատութիւններու վերաբերեալ համաժողովի հիմնական նպատակն է համախմբել տարբեր դաւանանքի գործիչներ՝ ընդդէմ կրօնական հետապնդումներու եւ յարձակումներու:
«Աշխարհի մէջ բոլոր մարդիկ պէտք է ազատ դաւանեն իրենց նախընտրած հաւատքը` իրենց տան, սրբատեղիներուն, հանրային վայրերու մէջ»,- նշած է Փոմփէօ։
Կրօնական հետապնդումներ եւ յարձակումներ վերապրածները հանդէս եկան վկայութիւններով: Եզիտի իրաւապաշտպան Նատիա Մուրատ, որ ՏԱՀԵՇ ծայրայեղական խմբաւորման կողմէ գերի առնուած էր հիւսիսային Իրաքի մէջ:
«Պատմութիւնն ու հետազօտութիւնները մեզ կը սորվեցնեն, որ ժամանակ առ ժամանակ տեղի կ՛ունենան ցեղասպան գործողութիւններ»,- յայտարարած է Մուրատ:
Սրի Լանքայի մէջ Սուրբ Զատիկի տօներու օրերուն քրիստոնէական եկեղեցւոյ վրայ յարձակումէն վերապրած Եամինի Ռաւիտրա կը նշէ, որ յարձակումէն ետք իրենց քրիստոնեայ համայնքը կ՛ապրի վախի մթնոլորտի մէջ: Մէկ այլ վերապրած Ֆարիտ Ահմետ, որուն կինը զոհուած է Նոր Զելանտիայի մէջ մզկիթի վրայ յարձակման ժամանակ նշած է , որ իր կրօնը իրեն սորվեցուցած է ներել մարդասպանները:
Կրօնական հողի վրայ յարձակումներ վերապրածները կ՛ընդգծեն` ողբերգութիւնը միաւորած է զիրենք ընդդէմ ատելութեան ու անհանդուրժողականութեան: