Մասիս Եպս. Զոպույեան Ընտրուեցաւ Բերիոյ Հայոց Թեմի Առաջնորդ

Բերիոյ հայոց թեմի Ազգային երեսփոխանական ժողովի 166-րդ նիստը գումարուեցաւ կիրակի, 2 Յունիս 2019-ի միջօրէի ժամը 12:30-ին, Ազգային  առաջնորդարանի դահլիճին մէջ` ներկայութեամբ թեմի երեսփոխաններուն, Ազգային կրօնական ժողովի եւ Ազգային վարչութեան կազմերուն:

Նիստը յատկացուած էր Բերիոյ հայոց թեմի նոր թեմակալ առաջնորդի ընտրութեան:

Ազգային երեսփոխանական ժողովի 166-րդ նիստը սկսաւ Արժ. Տ. Յուսիկ Ա. քհնյ. Սեդրաքեանի աղօթքով, ապա կարդացուեցաւ Արամ Ա. կաթողիկոսին նամակը, ուր վեհափառ հայրապետին կողմէ առաջարկուած էր թեմի նոր առաջնորդի ընտրութեան պարագային թեկնածուներու եռանուն ցանկ:

Յետ կայացած խորհրդակցութեանց եւ կարծիքներու փոխանակման, Ազգային երեսփոխանական ժողովի 166-րդ նիստը միաձայնութեամբ Բերիոյ հայոց թեմի առաջնորդ ընտրեց Մեծի Տանն Կիլիկիոյ կաթողիկոսութեան միաբան Մասիս եպս. Զոպույեան:

Բերիոյ հայոց թեմի նոր առաջնորդին ընտրութիւնը ընդունուեցաւ ծափողջոյններով, ղօղանջեցին Սրբոց Քառասնից Մանկանց մայր եկեղեցւոյ զանգերը:

Նիստը փակուեցաւ պահպանիչով եւ «Կիլիկիա» մաղթերգի համախումբ երգեցողութեամբ:

ԲԵՐԻՈՅ ՀԱՅՈՑ ԹԵՄԻ
ԱԶԳԱՅԻՆ ԵՐԵՍՓՈԽԱՆԱԿԱՆ ԺՈՂՈՎ