Ինչպէ՞ս Կարելի է Գրաւել Ա՛յն Մարդոց Տարածքը, Ուր Իրենք Դարերով Ապրած Են. Փաշինեանի Պատասխանը Ատրպէյճանցի Լրագրողին
Ս. Փեթերզպուրկի մէջ կազմակերպուած մամլոյ ասուլիսին ընթացքին՝ Հայաստանի վարչապետ Նիկոլ Փաշինեան պատասխանեց ատրպէյճանցի լրագրողի մը հարցումներուն: Ըստ Armenpress.am-ի՝ Հայաստանի վարչապետին ուղղուած հարցումներէն մէկուն մէջ, որ կը վերաբերէր Լեռնային Ղարաբաղի տագնապին, ատրպէյճանցի լրագրողը օգտագործեց ատրպէյճանական քարոզչութեան համար արդէն սովորական` «գրաւուած տարածքներ» արտայայտութիւնը: Ի պատասխան` վարչապետ Նիկոլ Փաշինեան ըսաւ.
«Ինչպէ՞ս կարելի է գրաւել տարածքը ա՛յն մարդոց, որոնք այնտեղ ծնած են, որոնց պապերն ու պապերուն պապերը այդտեղ ծնած են ու ապրած: Ինչպէ՞ս կարելի է այդ տարածքը գրաւել: Տարածք, ուր այս մարդիկը սերունդէ սերունդ, դարերով ապրած են. ինչպէ՞ս կարելի է ատիկա ընդհանրապէս պատկերացնել»: