Արցախի Մէջ Լայն Թափով Կ՛ընթանայ Պատմական Յուշարձաններու Վերականգնման Աշխատանքներ
Ընթացքի մէջ է Գտչավանքի վերականգնման գործընթացը: Ըստ «Արցախփրես»-ի՝ Հոկտեմբեր 25-ին կայացած մամուլի ասուլիսի ժամանակ ըսած է Արցախի մշակոյթի, երիտասարդութեան հարցերու եւ զբօսաշրջութեան նախարար Լեռնիկ Յովհաննիսեան` մանրամասնելով, որ պետական ամավարկի նախագիծով համապատասխան գումարը արդէն յատկացուծ է, որպէսզի Գտչավանքի ներքին յարդարման եւ եկեղեցւոյ վերանորոգման աշխատանքները հասցնեն աւարտին:
Անդրադառնալով Արցախի տարածքին առկայ շարք մը այլ պատմամշակութային յուշարձաններու պահպանութեան հարցին` նախարարը նշած է, որ տեղի ունեցած է յուշարձաններու դիտարկում, ստուգուած է Ասկերանի, Հադրութի, Մարտակերտի, Քաշաթաղի եւ Շահումեանի շրջաններու շարք մը յուշարձաններու պահպանութեան վիճակը:
«Ի յայտ բերուած են բազմաթիւ յուշարձաններ, որոնց մէջ նաեւ` Մարտակերտի շրջանին մէջ գտնուող «Վահանպէյի կամուրջ»-ը: Կազմուած է նախագիծ յառաջիկային զայն ամրակայելու ու վերականգնելու համար: Ընթացքի մէջ են Հադրութի շրջանի Ծակուռի գիւղի եկեղեցւոյ վերականգնման աշխատանքները:
Անոր խօսքով` քննարկուած են Դադիվանքի մոմատան վերականգնման, Դադիի եկեղեցւոյ ծածկի տեղադրման, օժանդակ ճանապարհի կառուցման եւ տարածքի բարեկարգման, Գանձասարի Սուրբ Յովհաննէս Մկրտիչ եկեղեցւոյ տանիքի նորոգման, ինչպէս նաեւ Հադրութի շրջանի Տող գիւղի Սուրբ Ստեփանոս եկեղեցւոյ վերականգնման նախագիծերը: Միաժամանակ քննարկուած է Հունոտի կիրճ արգելոցի տարածքին գտնուող պատմական կամուրջի էսքիզային նախագիծը:
Բացի ատոնցմէ, մաքրութեան աշխատանքներ տարուած են Տիգրանակերտի արգելոցի տարածքին, Բովուրխանի վանքի, ինչպէս նաեւ Աւետարանոցի ու Խնապատի պատմական գերեզմանոցներուն մէջ: Ընթացքի մէջ են եւ շուտով կ՛աւարտին Մոշխմհատի Ղեւոնդաց վանքի, Շահմասուրի եւ Գառնաքարի գերեզմանոցներու մաքրման աշխատանքները:
Անոր խօսքով` գերատեսչութիւնը արդիւնաւէտ կ՛աշխատին «Թուֆենքեան» բարեգործական հիմնադրամի հետ, մասնաւորապէս` անոնց միջոցներով ներկայիս կը վերականգնուի Քաշաթաղի շրջանի Հոչանց գիւղի եկեղեցին: