Լեւոն Արոնեան Յաղթած է Ֆապիանօ Գարվանային

Հայկական ճատրակի առաջատար Լեւոն Արոնեան յաղթանակով սկսած է Chess.com կայքի կազմակերպած Speed Chess Championship մրցաշարը, որ կ՝իրականացուի համացանցի միջոցով:

Ըստ sport.news.am-ի՝ առաջին խաղին Արոնեան 20.5-6.5 հաշիւով յաղթած է ԱՄՆ-ը ներկայացնող Ֆապիանօ Գարվանային եւ հասած քառորդ եզրափակիչ: Արոնեանի յաջորդ մրցակիցը պիտի ըլլայ Շաքրիար Մամետեարով (Ատրպէյճան) – Անիշ Կիրի (Հոլանտա) զոյգի յաղթողը:

Հայաստանի միւս ներկայացուցիչ Զաւէն Անդրիասեան՝ 1/8 եզրափակիչին՝ ուժերը պիտի չափէ հնդիկ Վիտիթ Կուճրաթիի հետ: Այդ մրցախաղը պիտի կայանայ Օգոստոս 30-ին՝ Երեւանի ժամանակով 20.00-ին: Զաւէն Անդրիասեան մրցաշարին մասնակցութեան իրաւունքը նուաճած է իբրեւ արդիւնք որակաւորման փուլին: