Բարսեղ Կանաչեանի, Նիկոլ Աղբալեանի Եւ Լեւոն Շանթի Վերանորոգուած Շիրիմներու Օրհնութիւն Եւ Հոգեհանգիստ՝ Անոնց Յիշատակին
Նախագահութեամբ Լիբանանի Հայոց թեմի առաջնորդ Նարեկ արք. Ալեէմէզեանի, հովանաւորութեամբ Համազգայինի Լիբանանի Շրջանային վարչութեան, նախաձեռնութեամբ Համազգայինի «Կոմիտաս» մասնաճիւղին, Կիրակի, 18 Նոյեմբերի յետմիջօրէին, Ֆըրն Շըպպեքի Ազգային գերեզմանատան մատրան մէջ տեղի ունեցաւ հոգեհանգստեան արարողութիւն Լեւոն Շանթի, Նիկոլ Աղբալեանի եւ Բարսեղ Կանաչեանի յիշատակին՝ հանդիսապետութեամբ Նարեկ արք. Ալեէմէզեանի ներկայացուցիչ Վիգէն վրդ. Տալգլճեանի:
Համազգայինի «Կոմիտաս» մասնաճիւղի ատենապետ Նորայր Նաճարեան այս առիթով արտասանած իր խօսքին մէջ յայտնեց, որ Համազգայինի 90ամեակին առիթով մասնաճիւղը փափաքած է միութեան հիմնադիրներ Լեւոն Շանթի, Նիկոլ Աղբալեանի, ինչպէս նաեւ հայ երգի մեծ վարպետ Բարսեղ Կանաչեանի շիրիմին մօտ կատարել իր ձեռնարկներէն մէկը՝ լուսարձակի տակ առնելով այն երեւոյթը, որ այս երեք մեծերուն ոգեղէն էութիւնը յիշելու կողքին, պէտք է յիշել նաեւ անոնց նիւթական գոյութիւնը:
«Կ՛ըսեն, որ ննջեցեալը կ՛ուզէ բուռ մը խունկ, մոմ ու աղօթք: Մենք եկած ենք այսօր քիչ մը աւելին ընելու: Եկած ենք նաեւ շնորհակալութիւն յայտնելու Նիկոլ Աղբալեանին եւ Լեւոն Շանթին, որոնք 90 տարիներ առաջ տեսլականը ունեցան Համազգայինի նման կազմակերպութեան մը ստեղծման անհրաժեշտութեան: Կազմակերպութիւն մը, որ 90 տարիներէ ի վեր աշխարհասփիւռ հայութեան մէջ վառ կը պահէ հայ գիրն ու դպրութիւնը, հայ մշակոյթը՝ պայքարելով Սփիւռքի մեծագոյն թշնամիին՝ ճերմակ ջարդին դէմ:
«Եկած ենք շնորհակալութիւն յայտնելու նաեւ Բարսեղ Կանաչեանին, որ Սփիւռքի մէջ տարածեց ու ստեղծագործեց հայ բիւրեղ երգն ու երաժշտութիւնը՝ շարունակելով իր ուսուցիչին՝ Մեծն Կոմիտասի գործը: 100 տարիէ ի վեր ՀՄԸՄի մէջ կը հնչէ ու պիտի հնչէ «Յառաջ նահատակ»ը, իսկ «Մեր հայրենիք»ը աշխարհին կը ներկայացնէ մեր Հայաստանի Հանրապետութիւնը», ըսաւ Ն. Նաճարեան:
Ըստ անոր՝ պահելով ճարտարապետական կառուցուածքը Լեւոն Շանթի եւ Նիկոլ Աղբալեանի դամբարանին, նորոգած են զայն եւ վերցուցած ժամանակի գործած աւերը, իսկ Բ. Կանաչեանի պարագային վնասուած շիրմաքարը փոխարինուած է նորով:
Իր խօսքի վերջին բաժինով Նորայր Նաճարեան շնորհակալութիւն յայտնեց այս ծրագիրի յաջողութեան համար նիւթական եւ բարոյական աջակցութիւն ցուցաբերած Յակոբ Գըլպաշեանին, Սեդա Յովնանեանին, որ իր ճարտարապետական գծագրութիւններով եւ հետեւողական հսկողութեամբ իրականացուցած է Կանաչեանի շիրիմի կառուցումը եւ Շանթի ու Աղբալեանի դամբարանին նորոգութիւնը, ինչպէս նաեւ՝ Վարանդ Ալեքսանտրեանին, Վիգէն Հաննէսեանին եւ Սարին Մազմանեանին՝ իրենց աջակցութեան համար: Ան յոյս յայտնեց, որ այս մեծերուն դամբարանները մոռացութեան չեն մատնուիր եւ անոնց այցելելու, խունկ ծխելու եւ մոմ վառելու նախաձեռնութիւններ կը կատարուին:
Ապա վերցուեցաւ քողը Կանաչեանի շիրմաքարին վրայէն, ուր, ինչպէս նաեւ Լեւոն Շանթի եւ Նիկոլ Աղբալեանի դամբարաններուն առջեւ զետեղուեցան ծաղկեպսակներ: «Բարսեղ Կանաչեան» երաժշտանոցի ուսուցիչ Յովիկ Գարախանեան ջութակի վրայ նուագեց Բարսեղ Կանաչեանի «Օրօր»ը, ինչպէս նաեւ հնչեց մեծ երաժիշտին ստեղծագործութիւնը հանդիսացող «Մեր հայրենիք»ը: