Կիլիկիոյ Կաթողիկոսը Հեռաձայնային Հաղորդակցութիւն Ունեցաւ Երուսաղէմի Հայոց Պատրիարքին Հետ
Ն.Ս.Օ.Տ.Տ. Արամ Վեհափառ Հայրապետը Ժընեւէն (Զուիցերիա) հեռաձայնային հաղորդակցութիւն մը ունեցաւ Երուսաղէմի հայոց Պատրիարք Ն.Ա.Տ. Նուրհան Արքեպիսկոպոս Մանուկեանի հետ։
Վեհափառ Հայրապետին եւ Պատրիարքին խորհրդակցութեանց առանցքը հանդիսացաւ Երուսաղէմի Պատրիարքութեան պատկանող «Կովերու Պարտէզ»ին շուրջ վերջերս ծագած խնդիրը։ Հայրապետը Պատրիարքին ուշադրութեան յանձնեց այս հարցին գծով մեր ժողովուրդին եւ շրջանին հետ առնչութիւն ունեցող երկիրներուն մօտ յառաջացած մտահոգութիւնը։ Պատրիարքը վստահեցուց Վեհափառ Հայրապետին, որ «Կովերու Պարտէզ»ին շուրջ կայացած համաձայնութիւնը չեղեալ համարելու ուղղութեամբ արդէն իսկ սկսած է գործնական քայլերու դիմել։
Յիշեցնենք, որ Երուսաղէմի հայոց պատրիարքութեան պատկանող «Կովերու պարտէզ» տարածքը 2021-ին 99 տարիով վարձակալութեան տրուած էր հրէայ գործարարի մը պատկանող ընկերութեան։ Գործարքը, դեռ այն ժամանակ, առիծ ստեղծած էր քննարկումներու եւ մեղադրանքներու։ Երուսաղէմի հայ համայնքը կը պահանջէ չեղեալ համարել գործարքը։