Ատրպէյճան Չի Կրնար Կոտրել Մեր Ժողովուրդի Վճռականութիւնն ու Միակողմանի Զիջումներ Պարտադրել. Նիկոլ Փաշինեան
Հայաստանի վարչապետ Նիկոլ Փաշինեան այսօր Մինսկի մէջ տեղի ունեցող Եւրասիական միջկառավարական խորհուրդի նիստին ըսած է, որ Ատրպէյճանը անտեսած է «Քորոնա» համաճարակի պայմաններուն մէջ զինուած հակամարտութիւններու դադրեցման մասին բազմաթիւ կոչերը եւ ռազմական գործողութիւններ ձեռնարկած է Հայաստանի դէմ:
«Հայաստանի զինուած ուժերը չէին կրնար անարձագանգ ձգել Ատրպէյճանի սադրիչ գործողութիւնները: Դժբախտաբար, սադրանքները կը շարունակուին մինչ օրս` նպաստելով լարուածութեան պահպանման ու իրավիճակի անկանխատեսելի զարգացման:
Ատրպէյճանի թշնամական քաղաքականութիւնը` ուղղուած տարածաշրջանին մէջ ռազմական լարուածութեան, որեւէ տեղ չի տանիր: Ան չի կրնար կոտրել մեր վճռականութիւնը, ստիպել անհիմն ու միակողմանի զիջումներու երթալ` Լեռնային Ղարաբաղի հակամարտութեան կարգաւորման հարցին շուրջ: Խնդրի ուժային լուծում գոյութիւն չունի, խաղաղ բանակցութիւններուն այլընտրանք չկայ»,-ըսած է Նիկոլ Փաշինեան: