Այսօր Հայ Անուանի Դերասան Սօս Սարգսեանի Ծննդեան Օրն է

Այսօր թատրոնի եւ կինոյի հայ անուան դերասան, ԽՍՀՄ Ժողովրդական արտիստ Սօս Սարգսեանի ծննդեան օրն է. մեծանուն վարպետը կը դառնար 90 տարեկան:

Սօս Սարգսեան ծնած է 1929-ին, Ստեփանաւան քաղաքին մէջ: 1948-ին տեղափոխուած է Երեւան եւ աշխատած Երեւանի պատանի հանդիսատեսի թատրոնին մէջ` որպէս դերասան: 1954-ին աւարտած է Երեւանի գեղարուեստաթատերական հիմնարկի դերասանական բաժանմունքը:

1954-1991 թուականներուն եղած է Երեւանի Գաբրիէլ Սունդուկեանի անուան ակադեմիական թատրոնի դերասան: 1991-ին հիմնադրած է համազգային թատրոնը: Նոյն տարին, որպէս Յեղափոխական Դաշնակցութեան կուսակցութեան թեկնածու, առաջադրուած է  նորանկախ Հայաստանի Հանրապետութեան նախագահութեան համար։ 1997-2006 եղած է Երեւանի թատրոնի եւ կինոյի պետական հիմնարկի տնօրէնը, 2006-էն` հիմնարկի կառավարման խորհուրդի նախագահը: 2009-ին ընտրուած է ՀՀ Հանրային խորհուրդի անդամ:

Նկարահանուած է քառասունէ աւելի գեղարուեստական ֆիլմերու մէջ, ինչպիսիք են` «Նուագախմբի տղաները»‚ «Եռանկիւնի»‚ «Մենք ենք, մեր սարերը», «Նահապետ»‚ «Խաթաբալա», «Ձորի Միրօ», «Սօլեարիս», Հայաստանի եւ Խորհրդային Միութեան տարածքին նկարահանուած բազմաթիւ այլ ֆիլմերու մէջ:

Մահացած է 2013-ի Սեպտեմբեր 26-ին թոքերու բորբոքումէն: ԽՍՀՄ եւ ՀԽՍՀ ժողովրդական արտիստ, Համազգային պետական թատրոնի հիմնադիր Սօս Սարգսեանի ծննդեան օրը` 2015 թուականի Հոկտեմբեր 24-ին, Երեւանի քաղաքի Տէրեան 65 հասցէին վրայ, ուր կը բնակէր վարպետը, բացուեցաւ անոր յիշատակին նուիրուած յուշատախտակը: