Հրաշափառ Սուրբ Յարութեան Տօնը Ատրպատականի Հայոց Թեմէն Ներս

«ԱԼԻՔ»

Մեր Տիրոջ եւ Փրկչի Հրաշափառ Յարութեան տօնը, մահւան վրայ տարւած յաղթանակի յոյսով մեր սրտերը լցնելու տօնն է համայն քրիստոնեայ աշխարհի համար: Ատրպատականի հայոց թեմում բնակւող Քրիստոսի փոքր հօտը եւս, ուրախակից դարձաւ քրիստոնեայ աշխարհին, Կիրակի, 9 Ապրիլի 2023թ.-ի առաւօտեան, Թաւրիզում, Ուրմիայում եւ Գեարդաբադում մատուցւած սուրբ պատարագներով: Հաւատացեալ ժողովուրդը միաբերան գոհաբանութիւն մատուցեց Աստծուն, Նրա Որդու հրաշափառ Սուրբ Յարութեամբ մարդկութեան ներշնչած զօրեղ յոյսի համար: Տեղեկացնում է Ատրպատականի ազգային առաջնորդարանը:

1. Թաւրիզ

Ս. Զատկւայ տօնի առիթով, եպիսկոպոսական հանդիսաւոր ս. եւ անմահ պատարագ մատուցւեց Լիլաւայի Ս. Սարգիս եկեղեցում, ձեռամբ Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանի:

Ս. Խորանին սպասարկում էին սարկաւագաց եւ դպրաց դասերի անդամները: Երգեցողութիւնը կատարւեց «Կոմիտաս» երգչախմբի կողմից, ղեկավարութեամբ երաժիշտ Վարդան Վահրամեանի: Գործք Առաքելոցի Ճաշու Գրքի ընթերցումը կատարեց Էմելիա Աբրահամեանը, իսկ «Խոստովանանք»-ը կարդաց Քարմէն Աբրահամեանը: Ս. պատարագին ներկայ գտնւեցին Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր՝ Արա Շահվերդեանը, եւ Թաւրիզում, Փոքրամասնութեան գրասենեակի պատասխանատուն: Սրբազան Հայրը պետական երկու անձնաւորութիւններին խօսք ուղղելով, հայերէն եւ թուրքերէն լեզուներով ողջունեց նրանց քաջալերական ներկայութիւնը եւ աղօթակցութիւնը, Ս. Զատկւայ տօնի առիթով:

Իր պատգամում, Սրբազան Հայրը Սուրբ Յարութեան նւիրւած շարականի բառերը բնաբան վերցնելով նկարագրեց այն պահը, երբ իւղաբեր կանայք թափուր էին գտել Տիրոջ գերեզմանը եւ տրտմութեամբ լացում էին, մինչեւ այն վայրկեանը երբ հրեշտակները երեւեցան նրանց ասելով. «Ինչո՞ւ ողջին մեռելների մէջ էք փնտռում»: Սրբազան Հայրը այս գաղափարի համեմատականը կատարեց բոլոր յուսահատութիւնների հետ, որոնք մարդիկ կրում են իրենց կեանքում ե’ւ անհատապէս ե’ւ հաւաքաբար: Մեղքերի տեսակներին անդրադառնալով, նա ասաց, որ Աստծու եւ մարդու հանդէպ գործւած մեղքերից բացի, կան նաեւ ազգի հանդէպ գործւած մեղքեր, որոնցից յարութիւն առնելու քաջութիւնն է ունենալու տւեալ ազգը, ճիշտ ժամանակին, այլապէս վերջը ուշ կը լինի: Յանցանքները իրար վրայ գցելու մանկապատանեկան խաղերի եւ քաղաքական խորամանկութիւնների ժամը չէ հիմա, այլ՝ միաբանութեամբ թշնամու դէմ կանգնելու անժամանցելի պահն է հիմա:

Սրբազան Հայրը անդրադառնալով հայրենիքի ու համայն ժողովրդի ներկայ դժւարին դրութեան, ասաց «Եկեղեցու հայրերը եօթ մահացու մեղքեր են նշել, որոնք արձանագրւած են ժամագրքի «Մեղայ»-ի բնագրում: Դրանց վրայ պիտի աւելացնել, անպայման, ութերորդ մահացու մեղքը, որը յատկապէս ներկայ աշխարհում հաւաքականութիւնների համար կարեւոր է. դա անմիաբանութեան մեղքն է, որը հսկայական աւերներ է գործում մարդկութեան կեանքում»,- ասաց նա:

Սրբազան Հայրը, կոչ ուղղելով մեր հայրենի ու սփիւռքի համայն հայութեան, ասաց. «Քաջութիւնն ունեցիր, ազգային մեղքերիցդ յարութիւն առնելու, եւ հաւատա’ որ ազգն ու հայրենիքը կը փրկւեն այս օրհասական պահից»:

Ս. պատարագից յետոյ, Ս. Սարգիս եկեղեցու շրջափակում բոլոր ներկաները մասնակից դարձան հաւկթախաղի: «Արարատ»-ի Թաւրիզի մասնաճիւղի պատրաստած գունագեղ հաւկիթների առատ տրամադրումը մեծ խանդավառութիւն ստեղծեց աւագ թէ կրտսեր սերնդի մեր զաւակների մօտ, որոնք տօնի յատուկ այս խաղով մեծապէս ուրախացան:

2. Ուրմիա

Ուրմիայի Ս. Ստեփանոս ծխական եկեղեցում Զատկական ս. պատարագը մատոյց եւ քարոզի փոխարէն Սրբազան Հօր Ս. Զատկւայ պատգամը ընթերցեց, արժ. Տ. Մարտիրոս քհնյ. Ղուկասեան:

Խորանին սպասարկեց կրտսերաց դպրաց դասը, իսկ երգեցողութիւնը կատարւեց «Նարեկացի» երգչախմբի կողմից, ղեկավարութեամբ Օֆելիա Սայեադեանի: Կանուխ ժամերից ուրմիահայ հաւատացեալներ մեծ թւով ներկայ էին ս. պատարագին եւ ապա հաղորդւեցին Քրիստոսի մարմնով եւ արեամբ:

Ս. Ստեփանոս ծխական եկեղեցու Կանանց Խնամակալ մարմնի կողմից եկեղեցին յարդարւել էր տօնի յատուկ զարդարանքով, իսկ Հ.Մ.Ա.Կ.-ի Ուրմիայի մասնաճիւղը գունագեղ հարիւրաւոր հաւկիթներ պատրաստել էր, որոնք շրջափակում յաւելեալ խանդավառութեան առիթ հանդիսացան յատկապէս նոր սերնդի զաւակներին:

Նշենք, թէ Զատկի նախորդ օրը՝ շաբաթ, 8 սպրիլի երեկոյեան, Թաւրիզում եւ Ուրմիայում Ճրագալոյցի ս. պատարագ մատուցւեց եւ աւետւեց Քրիստոսի Հրաշափառ Յարութիւնը: Թաւրիզում մատուցւած ս. պատարագին ներկայ գտնւեց Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը: Պատարագի կէսին, Սրբազան Հայրը ժողովրդին դառնալով աւետեց Ս. Յարութիւնը: Նա յիշեցրեց, որ «Աւագ շաբաթ օրը տարւայ միակ օրն է, երբ առաւօտեան արթնանալով «բարի լոյս» չենք ասում իրար, որովհետեւ մեր Տէրը դեռեւս գերեզմանում է գտնւում: Սակայն Ճրագալոյցի ս. պատարագի ճիշտ այս պահին ո’չ թէ սովորական լոյսն ենք մաղթում իրարու, այլ յարութեան լոյսը, որովհետեւ ճիշտ այս պահին Քրիստոս Յարեա՜ւ ի մեռելոց, Օրհնեալ է Յարութիւնը Քրիստոսի»,- եզրակացրեց Սրբազան Հայրն, իսկ ժողովուրդը հաւատքով երեք անգամ կրկնեց «Օրհնեա՜լ է Յարութիւնը Քրիստոսի»: Յայտնենք, թէ Ճրագալոյցի առիթով երեկոյեան ժամերգութիւն տեղի ունեցաւ Գեարդաբադի Ս. Գէորգ եկեղեցում, Տ. Մարտիրոս քհնյ. Ղուկասեանի միջոցով:

Եկեղեցական հոգեթով արարողութիւնները եւ ազգային հնաւանդ աւանդութիւնները զօրացրին մասնակից բոլոր հաւատացեալներին, որոնք իրենց ջերմեռանդ աղօթքով գօտեպնդեցին իրար, եւ Քրիստոսի Սուրբ Յարութեան յոյսով զօրացած, վերադարձան իրենց տները:

Նոյն օրը, երեկոյեան ժամը 6-9, Թաւրիզում, ազգային առաջնորդարանի «Էմիլ Յակոբեան» դահլիճում, Սրբազան Հայրը եւ ազգային իշխանութեան ներկայացուցիչները ընդունեցին ժողովրդի շնորհաւորանքը: Քաղաքում գործող բոլոր միութիւններն ու կազմակերպութիւնները իրենց վարչական կազմերով ներկայացան, Սրբազան Հօր օրհնութիւնը ստանալու եւ շնորհաւորելու Ս. Զատկւան տօնը: Սոյն ընդունելութեան ներկայ գտնւեց նաեւ պատգամաւոր Արա Շահվերդեանը, եւ իր գնահատանքի խօսքը ուղղեց Ատրպատականի հայոց թեմի ժողովրդին: Դարձեալ շնորհաւորանքի սոյն ընդունելութեան ներկայ գտնւեց, Իրանի եկեղեցիների պահպանութեան պետական գրասենեակի տնօրէն Շերլի Աւետեանը:

Երկուշաբթի, 10 ապրիլին, Մեռելոց Յիշատակի առիթով, ե’ւ Թաւրիզում ե’ւ Ուրմիայում տեղի ունեցան հոգեհանգստեան արարողութիւններ եւ գերեզմանօրհնէք: