Հայաստանի Ճատրակի Տղամարդոց Հաւաքականը՝ Ողիմպիականի Արծաթէ Մետալակիր

9 Օգոստոս 2022-ին Հայաստան դարձած է ճատրակի համաշխարհային ողիմպիականի փոխ ախոյեան:

Հնդկաստանի Չեննա քաղաքին մէջ տեղի ունեցող ճատրակի համաշխարհային 44-րդ ողիմպիականի վերջին բաժինի առաջնակարգերը՝ Ուզպեքիստանի եւ Հայաստանի հաւաքականները, յաղթած են իրենց մրցակիցներուն։

Հայաստանի տղոց հաւաքականը 2:5-1:5 կէտով յաղթած է Սպանիոյ հաւաքականին: Յաղթանակի կէտը ապահոված է յառաջատար Գաբրիէլ Սարգսեան։ Ուզպեքիստանի ճատրակ խաղացողները նոյն հաշիւով յաղթած են Հոլանտայի խումբին։

Այսպիսով, Ուզպեքիստանի եւ Հայաստանի հաւաքականները հաւաքած են 19-ական կէտ, սակայն, դժբախտաբար, լրացուցիչ ցուցանիշներով ողիմպիական ոսկին վերապահուած է Ուզպեքիստանի հաւաքականին, իսկ Հայաստանի ճատրակ խաղացողները նուաճած են ողիմպիական արծաթը։

Հայաստանի հաւաքականը փայլուն ելոյթ ունեցած է Ճատրակի համաշխարհային 44-րդ ողիմպիականին: