Ազրպէյճան Իր Սադրիչ Քայլերով Կը Փորձէ Լարուածութիւն Մտցնել Հայ Յունական Յարաբերութիւններուն Մէջ. Դեսպան Մկրտչեան
Թեսաղոնիկէի քաղաքային հանրակառքին վրայ յայտնուած ատրպէյճանական «Շուշին Ազրպէյճան է» գովազդին անդրադարձաւ Յունաստանի մէջ ՀՀ նորանշանակ դեսպան Տիգրան Մկրտչեան, «Արմէնփրես»-ի հետ ունեցած զրոյցին ընթացքին։ Դեսպանը նշեց, թէ քաղաքական բնոյթ կրող սադրիչ գովազդը վար առնուեցաւ շնորհիւ դեսպանութեան եւ յունահայ կառոյցներու, Հայ Դատի յանձնախումբի միացեալ ջանքերուն, որոնք յատուկ քայլերով դիմեցին քաղաքական եւ տեղական իշխանութիւններուն։
Ան մասնաւորապէս ընդգծեց, որ Ազրպէյճանի կողմէ նմանօրինակ գործողութիւններ կարելի է սպասել ոչ միայն Յունաստանի մէջ, ուր ատրպէյճանական փոքր համայնք կայ, այլեւ այլ երկրներու մէջ եւս: «Ազրպէյճանը ուղղակի կը փորձէ նման սադրիչ քայլերով որպէս իրականութիւն ներկայացնել ու յաւերժացնել ուժի կիրառման հետեւանքով արձանագրուած արդիւնքները, մինչդեռ մենք յստակ գիտենք, որ Լեռնային Ղարաբաղի կարգավիճակի հարցը կը մնայ բաց: Ատոր մասին ԵԱՀԿՄինսկի խումբի համանախագահ բոլոր երկիրներն ալ խօսած են: Այնպէս կ՝երեւի՝ Ազրպէյճանը նման մեթոտներով կը փորձէ մէկընդմիշտ «ֆիքսել», թէ իբր Շուշին ազրպէյճանական է եւ չի կրնար վերանայուիլ Շուշիի վերադարձ Լեռնային Ղարաբաղի կազմին մէջ։ Բայց Լեռնային Ղարաբաղը ունի իր յստակ վարչական սահմանները եւ Շուշին, ինչպէս նաեւ Հադրութը միանշանակ այդ սահմաններուն մէջ են: Շուշին եւ Հադրութը այս պահուն գրաւուած են: Նման քայլերով Ազրպէյճանը կը փորձէ տպաւորութիւն ստեղծել, թէ այդ հարցը փակուած է: Ազրպէյճանը կ՝երթայ ընդդէմ բանակցային գործընթացի տրամաբանութեան: Այս քայլը ես կը դիտարկեմ որպէս սադրանք՝ յատկապէս այնպիսի բարեկամական երկրի մէջ, ինչպէս Յունաստանն է, որուն իշխանութիւնները մէկ անգամ չէ, որ համերաշխութիւն յայտնած են ՀՀ դիրքորոշումներուն համահունչ: Նման սադրիչ քայլով կը փորձեն լարուածութիւն մտցնել հայ-յունական յարաբերութիւններուն մէջ, որ, բնականաբար, պիտի չի յաջողի»,- եզրափակեց Յունաստանի մէջ ՀՀ դեսպան Տիգրան Մկրտչեան: