Մտաւորականութեան Պարտականութիւնն Է Պաշտպանել Արեւելահայերէնի Եւ Արեւմտահայերէնի Զուգընթաց Ճանապարհը. Փրոֆ. Սուրէն Դանիէլեան

«Ազդակ»-ի 33-րդ առցանց  լսարանը տեղի ունեցած է Յուլիս 8-ին, երեկոյեան ժամը 7:00-ին: Դասախօսած է «Սփիւռք» գիտաուսումնական կեդրոնի տնօրէն փրոֆ. Սուրէն Դանիէլեան: Լսարանը վարած է «Ազդակ»-ի ելեկտրոնային բաժինի աշխատակից Մինաս Հանս Քէհեան: Այս մասին ԵՌԱԳՈՅՆ-ը կը տեղեկանայ «Ազդակ»-էն։

Փրոֆ. Դանիէլեան ներկայացուցած է հայագիտական ուսումնառութեան ներկայ իրավիճակը, կրթական մրցունակ ցանցի եւ կրթական միասնական ծրագիրի բացակայութիւնը:

Դասախօսը տուեալներով ներկայացուցած է նաեւ Հայաստանի Հանրապետութեան հանրակրթական ծրագիրներուն մէջ արեւմտահայերէն գրականութեան եւ արեւմտահայ գրողներու ու բանաստեղծներու ներառուած բաժինը, որ հեռու է արեւմտահայ գրականութեան ճանաչողականութիւնը ապահովելու առաջադրանքէն:

Դասախօսը օրինակներ տալով նշած է նաեւ, որ այն գրողները, որոնք արեւմտահայ գրականութենէն անցում կատարած են արեւելահայ գրականութեան, չեն նպաստած ընդհանրապէս հայ գրականութեան զարգացման:

Փրոֆ. Դանիէլեան յատուկ վերլուծում կատարած է պոլսահայ գրականութեան երեւոյթին վերաբերեալ` նկատի ունենալով յատկապէս 1970-ական թուականներէն մինչեւ 2010 երկարող ժամանակահատուածը:

Արեւմտահայ գրականութիւն դասաւանդող ուսուցիչներու պատրաստութիւնը հրամայական նկատելով` դասախօսը ընդգծած է արեւմտահայ գրականութեան ճանաչողականութեան ապահովման համար Հայաստանի Հանրապետութիւն-սփիւռք համատեղ աշխատելու անհրաժեշտութիւնը:

«Մտաւորականութեան պարտականութիւնն է պաշտպանել արեւելահայերէնի եւ արեւմտահայերէնի  զուգընթաց ճանապարհը»,- իր խօսքի աւարտին նշած է փրոֆ. Սուրէն Դանիէլեան:

Դասախօսութեան յաջորդած է գրականագիտութեան եւ լեզուաբանութեան արդի հարցերուն, միացեալ ուղղագրութիւն որդեգրելու եւ յատկապէս Հայաստանի Հանրապետութեան մէջ արեւմտահայ գրականութեան ճանաչողականութեան մակարդակը բարձրացնելու մասին քննարկում: