Արցախը Արժանի Է Անկախութեան Ճանաչման. Պարոնուհի Գարոլայն Գոքս
Մայիս 18ին, Գանատայի «Հորիզոն» շաբաթաթերթի աշխատակից Նազիկ Հանէշեան հեռակապով հարցազրոյց մը ունեցած է Մեծն Բրիտանիոյ Լորտերու Պալատին անդամ Պարոնուհի Գարոլայն Գոքսի հետ։
Հարցազրոյցին ընթացքին Պարոնուհի Գարոլայն Գոքս վկայակոչած է Ատրպէյճանի կողմէ գործուած պատերազմական ոճիրները եւ մարդկային իրաւանց խախտման պարագաները։ Միաժամանակ ան իր հիացմունքը արտայայտած է Արցախի ժողովուրդին քաջութեան եւ խիզախութեան հանդէպ, շեշտելով, որ Արցախը արժանի է անկախութեան ճանաչման։ Հարցազրոյցի աւարտին՝ Պարոնուհի Գոքս կոչ ուղղած է Գանատայի խորհրդարանի անդամներուն, որպէսզի զգօն ըլլան ատրպէյճանական կողմի սադրանքներուն դիմաց։
Պարոնուհի Գոգս 86 անգամ այցելած է Արցախ։ Ան նաեւ բազմիցս Մեծն Բրիտանիոյ Լորտերու Պալատին մէջ ելոյթ ունենալով վկայած է Արցախի մէջ Պաքուի կողմէ գործադրուած յանցագործութիւններուն մասին, յատկապէս յատուկ զեկոյցով վկայած է Մարաղայի կոտորածին մասին։
Արցախեան պատերազմի ընթացքին Պարոնուհի Գոքսը նիւթական եւ բարոյական անգնահատելի օգնութիւն ցուցաբերած է շրջափակման մէջ գտնուող արցախահայութեան։ Հրադադարէն ետք, իր գործօն աջակցութեամբ Ստեփանակերտի մէջ հիմնուած է ողնաշարի վնասուածքով հիւանդներու համար վերականգնողական բուժարան։