«Հայաստան» Համահայկական Հիմնադրամը Ունի 11 155 985 տոլարի Հանգանակութեան Խոստում

Areky Հայաստան

Հեռուստամարաթոնէն երեք ամիս անց նուիրատուութիւններու հոսքը կը շարունակուի, որու արդիւնքով «Հայաստան» համահայկական հիմնադրամը արդէն իսկ ունի 11,155,985 ԱՄՆ տոլարի խոստում:

Այս մասին կը յայտնեն հիմնադրամէն:

«2019-ի Դեկտեմբերի սկիզբը համեմատութեամբ նուիրատւութիւնները աճած են 920,138 տոլարով: Խոստումներուն մեծ մասը արդէն իսկ փոխանցուած է Հիմնադրամին եւ ցանցի տեղական մարմիններու հաշուեհամարներուն:

Այս տարի աննախադէպ թիւով մարդ մասնակցած է համահայկական դրամահաւաքին` միայն Հայաստանէն եւ Արցախէն շուրջ 10,000 անհատ եւ կազմակերպութիւն: Իսկ եթէ հաշուի առնենք, թէ ներգրաւուած կազմակերպութիւնները քանի հոգի կը ներկայացնեն, ապա մասնակցայնութեան թիւը շատ աւելին է: Սփիւռքի մասնակցայնութիւնը մօտաւոր գնահատականներով շուրջ 25,000 է: Ըստ հիմնադրամի նոր ռազմավարութեան` ընդգծուած կարեւորութիւն կը տրուի մասնակցութեան, ուստի այս տարուան արձանագրուած ցուցանիշը առանձնայատուկ ոգեւորիչ է: Շնորհակալ ենք Հիմնադրամի բոլոր նուիրատուներուն: Միասնական ջանքերով է, որ կը կերտենք աւելի ուժեղ Հայրենիք:

Միայն առցանց նուիրատւութիւններով` հիմնադրամի ցանցը արդէն ունի շուրջ 5,000 առցանց նուիրատու (որոնղմէ 1550-ը Լոս Անճելըսի տեղական մարմինի կայքով), որոնք միասին մէկ տարուան մէջ կ՛առաջացնեն 560,000 ԱՄՆ տոլար: Ատկէ 1938-ը միացած են #Մէկբաժակսուրճ-ի գաղափարին, այն է` պարբերական վճարման համակարգին:

#ArmeniaFundChallenge-ին միացած էին շարք մը հանրային գործիչներ Հայաստանէն եւ Սփիւռքէն: Անոնց մէջ էին ՀՀ վարչապետը, ՀՀ ԱԺ նախագահը, ԱԺ փոխնագահները, Սերժ Թանքեանը, Ալեքսիս Օհանեանը, Էրիկ Էսրաելեանը, Վահէ Պերպերեանը,  Իւետա Մուկուչեանը, Խորէն Լեւոնեանը եւ այլք: հեռուստամարաթոնի կարգախօսն էր` «Ես իմ անուշ Հայաստանի․ կենարար արեւ ու ջուր համայնքներուն», ուստի հաւաքագրուած գումարները հիմնականօրէն պիտի յատկացուին խմելու ջուրի հասանելիութեան եւ արեւային վահանակներու տեղադրման Արցախի եւ Հայաստանի որոշ համայնքներու մէջ»,- ըսուած է հիմնադրամի տարածած հաղորդագրութեան մէջ:

«Հայաստան» համահայկական հիմնադրամի առաքելութիւնը համահայկական ցանցային համակարգի ձեւաւորումն է, որուն նպատակը Հայաստանի, Արցախի, ինչպէս նաեւ աշխարհասփիւռ հայկական համայնքներու համաչափ, կայուն եւ փոխկապակցուած զարգացման ապահովումն է` հիմնուելով ընդհանուր ինքնութեան վրայ: