ԵՄ-ն Թուրքիոյ Կոչ Կ՛ընէ Դադրեցնելու Ռազմական Գործողութիւնները Սուրիոյ Մէջ
Եւրոպական Միութիւնը Անգարային կոչ կ՛ընէ դադրեցնելու ռազմական գործողութիւնները Սուրիոյ հիւսիս-արեւելեան շրջաններուն մէջ: Այս մասին կը հաղորդէ «Թերթ»-ը՝ վկայակոչելով Եւրոմիութեան դիւանագիտութեան ղեկավար Ֆետերիքա Մոկերինիին:
«Սուրիոյ հիւսիս-արեւելքը Թուրքիոյ ռազմական գործողութիւններու պատճառով ԵՄ-ն կը հաստատէ, որ սուրիական հակամարտութեան կայուն լուծումի կարելի չէ հասնիլ ռազմական ճանապարհով: ԵՄ-ն կոչ կ՛ընէ Թուրքիոյ դադրեցնելու միակողմանի ռազմական գործողութիւնները»,- Մոկերինիի խօսքերը կը մէջբերէ «Եզվեսթիա» գործակալութիւնը:
Մոկերինին նշած է նաեւ, որ ԵՄ-ն օգնութիւն չի ցուցաբերեր կայունացման կամ այն շրջաններու զարգացման հարցով, ուր տեղի բնակչութեան իրաւունքները կ՛անտեսուին:
Յիշեցնենք, որ նախապէս սուրիացի քիւրտերու եւ «Իսլամական պետութեան» դէմ ռազմական գործողութիւն սկսելու մասին յայտարարած էր երկրի նախագահ Ռեճեփ Թայիփ Էրտողանը:
Թուրքիոյ ԱԳ նախարար Մեւլութ Չաւուշօղլու, իր հերթին, յայտարարած էր, որ «Խաղաղութեան աղբիւր» անուանումը ստացած գործողութիւնը սկսելէն առաջ թրքական կողմը տեղեակ պահած է Սուրիոյ կառավարութեան` նոր անդրսահմանային գործողութեան մեկնարկին մասին: