Խումբ Մը Ախալքալաքցիներ Արարատ Լերան Գագաթին Հայաստանի ու Վրաստանի Դրօշները Ծածանած են

Օգոստոս 1-3, խումբ մը ախալքալաքցիներ եւ երկու մասնակից Հայաստանէն, բարձրացած են բիբլիական Արարատ լերան գագաթ եւ այնտեղ պարզած հայկական եւ վրացական դրօշները։ Այս մասին կը հաղորդէ Akhaltskha.net-ը։

«Մեր ուխտագնացութիւնը դէպի Արարատ լեռ նուիրեցինք հայ-վրացական յարաբերութիւններու ամրապնդման նպատակին։ Դէպի սրբազան լերան գագաթ հասնիլը տեւեց երեք օր։ Հասնելով լերան գագաթ՝ մեր խումբը այնտեղ պարզեց Հայաստանի եւ Վրաստանի դրօշները, որ մեզմէ առաջ ոչ-ոք միասին պարզած էր։ Ատիկա կը վկայէ, որ հայ-վրացական եղբայրական կապերը միշտ պէտք է ամուր պահել ու ալ աւելի ամրացնել»,- ըսած է Գէորգ Պետրոսեան ու ընդգծած, որ ուխտագնացութեան ծիրէն ներս այցելած են նաեւ Անի քաղաք եւ Բայազետի բերդ։