Արարատ Միրզոյեան Այցելեց «Հայրենիք»
Հայաստանի Ազգային ժողովի նախագահ Արարատ Միրզոյեան, Ուաշինկթընի մէջ գիտաժողովին մասնակցելէ եւ հանդիպումներ ունենալէ ետք, ժամանեց Պոսթըն եւ այցելեց հայկական կեդրոններ եւ տեսակցեցաւ զանազան ներկայացուցիչներու հետ: Այս մասին կը հաղորդէ «Հայրենիք»-ը։
Ուրբաթ, Յուլիս 19-ի երեկոյեան, նախքան գաղութին հետ տեսակցիլը, Միրզոյեան ժամանեց «Հայրենիք» եւ այցելեց Հայաստանի Ա. հանրապետութեան եւ Հ.Յ.Դ.-ի արխիւները: Ազգային ժողովի նախագահը մօտէն հետեւեցաւ պատասխանատու Ճորճ Աղճայեանի փոխանցած տեղեկութիւններուն: Հ.Յ.Դ. արեւելեան Ա.Մ.Ն.-ի ներկայացուցիչ՝ Աղճայեանին կ՛ընկերակցէր նաեւ Անի Չաղլասեան:
Միրզոյեան ակնածանքով եւ մեծ հետաքրքրութեամբ հետեւեցաւ տրուած մանրամասնութիւններուն: Աւարտին, տեղի ունեցաւ յուշանուէրներու փոխանակում: