Հայաստան Եւ Արցախ Պատերազմ Չեն Ուզեր, Բայց Պատերազմի Սպառնալիքով Չեն Կրնար Մեզ Վախցնել. ՀՀ Վարչապետ

Հայաստանն ու Արցախը պատերազմ չեն ուզեր, բայց «պատերազմի սպառնալիքով ոեւէ մէկը չի կրնար մեզ վախցնել»: Այս մասին, ըստ Armenpress.am-ի, ԱԺ-ի մէջ կառավարութեան անդամներու հետ հարց ու պատասխանի ժամանակ, ըսած է ՀՀ վարչապետ Նիկոլ Փաշինեան։ Վարչապետը նշած է, թէ Ատրպէյճան կը փորձէ Արցախի հարցի կարգաւորումը դուրս բերել կառուցողական, բանակցային հունէն:

«Պատերազմը չէ աւարտած, որեւէ ատեն կրնայ բռնկիլ, իրավիճակի լարում ըլլալ: Ատրպէյճանը պարզապէս կ՛ուզէ կիրարկել նոյն գործիքը, որ երկար ժամանակ կիրարկած է` փորձել դուրս բերել հարցի լուծումը բանակցային հունէն»,- ըսած է Փաշինեան:

Վարչապետը յայտնած է, որ Հայաստան բանակցային հոլովոյթին մէջ իր դիւանագիտական ջանքերը կը շարունակէ 12 Մարտին Ստեփանակերտի մէջ հռչակուած սկզբունքներուն ծիրին մէջ:

«Մեր դիւանագիտական ջանքերը որոշ ուղղութիւններով եղած են շատ արդիւնաւէտ: Մեր դիւանագիտութիւնը սկսած է աւելի ու աւելի արդիւնաւէտ ըլլալ»,- հաստատած է Փաշինեան: