Ամենայն Հայոց Կաթողիկոսը Ընդունեց Վիրահայոց Թեմի Ուխտաւորները (լուսանկարներ)
Յունիս 13-ին, Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը, Մայրաթոռ Սուրբ Էջմիածինի մէջ ընդունեց Վիրահայոց թեմի ուխտաւորները՝ ուղեկցութեամբ Թիֆլիսի Սուրբ Գէորգ առաջնորդանիստ եկեղեցւոյ հոգեւոր հովիւ Արժանապատիւ Տ. Յուսիկ քահանայ Յարութիւնեանի: Այս մասին կը յայտնեն Մայր Աթոռ Սուրբ Էջմիածինէն։
Տէր Յուսիկ քահանան Նորին Սրբութեան տեղեկացուց, որ վիրահայերու ուխտագնացութեան նպատակը Մայր Աթոռի սրբութեան ու զօրութեան հաղորդակցուիլն է ու Ամենայն Հայոց Կաթողիկոսէն հայրական օրհնութիւն ստանալը:
Այնուհետեւ, Վեհափառ Հայրապետը իր օրհնութիւնը փոխանցեց ուխտաւորներուն` ողջունելով Վիրահայոց թեմի հաւատաւոր հայորդիները Մայր Աթոռ Սուրբ Էջմիածին առաջնորդելու նախաձեռնութիւնը: Նորին Սրբութիւնը կարեւոր համարեց հայրենիքէն հեռու բնակող հայորդիներուն այցելութիւնները Հայաստան եւ հաղորդ դառնալը պատմական սրբավայրերուն, ժողովուրդի ապրելակերպին, հոգսերուն ու ձեռքբերումներուն, որպէսզի լիցքաւորուած եւ զօրացած վերադառնալով իրենց օճախները՝ անոնք աւելի նախանձախնդրութեամբ լծուին ազգային եւ հայրենական կեանքի շինութեան:
Գարեգին Բ Հայրապետը փաստեց, որ քանիցս հովուապետական այցով եղած է Վրաստան եւ ականատես դարձած վիրահայերու զօրաւոր հաւատքին, որուն շնորհիւ անոնք կրցած են պահպանել եւ աշխոյժ պահել իրենց ազգային, հոգեւոր եւ մշակութային կեանքը: Հայոց Հովուապետը յորդորեց ուխտաւորներուն չընկրկելու ծառացած դժուարութիւններուն առջեւ, այլ՝ զօրացած նախնիներու հաւատքով՝ շարունակելու արարել եւ ստեղծագործել ի պայծառութիւն հայոց կեանքի եւ Վիրահայոց թեմի:
Հանդիպման ընթացքին Նորին Սրբութիւնը նաեւ իր գնահատանքը յայտնեց Վիրահայոց թեմի հոգեւոր դասին՝ իրենց առաքելութիւնը նախանձախնդրութեամբ եւ նուիրումով իրականացնելու եւ ազգային արժէքները պահպանելու համար:
Աւարտին, Նորին Վեհափառութիւնը հայորդիներուն մաղթեց, որ Աստուած նորոգէ անոնց ուխտը՝ մշտապէս պահելով Իր սիրոյ եւ խաղաղութեան մէջ:
