Յունաստան-Հայաստան Մրցումը Կը Կայանայ Այս Գիշեր
«UEFA-2020» Եւրոպայի մրցաշարքի ծիրէն ներս, այս գիշեր` տեղի պիտի ունենայ Յունաստան-Հայաստան ոտնագնդակի մրցումը, Աթէնքի (Մարուսի) Ողիմպիական մարզադաշտին վրայ։
Կիրակի օր, Հայաստանի հաւաքականը ժամանեց Աթէնք եւ արդէն սկսաւ փորձեր կատարել։
«Ազատ օր»-ի տեղեկութիւններով՝ մրցումը պիտի սկսի գիշերուան ժամը 21:45ին։ Հայաստանի խումբի մարզասէր հասարակութեան համար նախատեսուած են մարզադաշտի 19-րդ եւ 21-րդ բաժինները։ Յունական «OPEN Beyond» հեռատեսիլի կայանը յայտարարեց, թէ ուղիղ պիտի հեռասփռէ մրցումը իր ալիքներէն։
Յունաստանի Հ.Մ.Ը.Մ.-ի Շրջ. Վարչութիւնը կոչ ուղղած է միութեան անդամներուն եւ ժողովուրդին ներկայ ըլլալու մրցումին եւ քաջալերելու Հայաստանի խումբը։
Այս գիշեր, յունահայութեան ուշադրութիւնը կեդրոնացած պիտի ըլլայ հայ մարզիկներուն վրայ եւ իրենց յաղթանակի սպասումին։