Ռոպերթ Քոչարեանի Դատավարութիւնը Կասեցուեցաւ. Գործը Կը Տեղափոխուի Սահմանադրական Դատարան

Դատախազութիւնը կը պատրաստուի բողոքարկել Հայաստանի երկրորդ նախագահ Ռոպերթ Քոչարեանի խափանման միջոցը փոխելու մասին Երեւանի ընդհանուր իրաւասութեան առաջին ատեանի դատարանի Մայիս 18-ի որոշումը: Այս մասին յայտնեց գլխաւոր դատախազի խորհրդական Գոռ Աբրահամեան:

Յիշեցնենք, որ Մայիս 18-ին, դատարանը՝ դատաւոր Դաւիթ Գրիգորեանի նախագահութեամբ, փոխեց Քոչարեանի խափանման միջոցը՝ կալանաւորումը, անձնական երաշխաւորութեամբ զայն ազատ արձակելով բանտէն:

Աբրահամեան տեղեկացուց նաեւ, որ դատախազութիւնը մտադիր է ինքնաբացարկի միջնորդութիւն ներկայացնել դատաւորին:

Ըստ «Փաստինֆօ»-ի ունեցած տեղեկութիւններուն՝ դատաւորը որոշում տուաւ վարոյթը կասեցնելու եւ դիմելու Սահմանադրական դատարան: Քոչարեանի պաշտպանական խումբի մամլոյ քարտուղարը տեղեկացուց, որ դեռեւս չեն ստացած որոշումը, հետեւաբար այս պահուն չեն կրնար մեկնաբանութիւններ կատարել:

Նման տեղեկութիւն ստացած է նաեւ «Սիվիլնեթ»-ը՝ Մարտ 1-ի անջատուած գործով մեղադրեալ Սէյրան Օհանեանի պաշտպաններէն Ինեսսա Պետրոսեանէն:

«Դատարանը որոշած է գործի վարոյթը կասեցնել ու ուղարկել Սահմանադրական դատարան 300.1 յօդուածի հետ (Սահմանադրական կարգը տապալելու) կապուած սահմանադրականութեան հարցը որոշելու հետ»,- յայտնեց Պետրոսեան:

Նշենք, որ Հայաստանի դատախազութիւնը յայտարարեց, որ Քոչարեանի գործը քննող Երեւան քաղաքի ընդհանուր իրաւասութեան դատարանի դատաւոր Դաւիթ Գրիգորեանը ինքնաբացարկ յայտնելու վերաբերեալ միջնորդութիւն պիտի ներկայացնեն:

Նախապէս դատախազները յայտարարած էին, որ կը պատրաստուին Քոչարեանի կալանքը անձնական երաշխաւորութեամբ փոխելու դատարանի որոշումը բողոքարկել: