«Սարդարապատէն Մինչեւ Շուշի»
Հպարտութիւն առթող երիտասարդական եզակի համախմբում էր Հայ ժողովուրդի Մայիսեան յաղթանակներուն նուիրուած խնճոյք-խրախճանքը
Հ.Մ.Ը.Մ.-ի Երիտասարդական Համաշխարհային Ա. Համագումարի եւ Հ.Յ.Դ. Եւրոպայի Երիտասարդական Միութիւններու Խորհրդաժողովին Աթէնքի մէջ բարեպատեհ զուգադիպութեան առիթով, խնճոյք-խրախճանք տեղի ունեցաւ Գոքինիոյ «Զաւարեան» Կեդրոնէն ներս, Շաբաթ 11 Մայիս 2019-ի երեկոյեան, Յունաստանի Հ.Յ.Դ. Յունաստանի Երիտասարդական Միութեան Կեդրոնական Վարչութեան եւ Հ.Մ.Ը.Մ.-ի Շրջանային Վարչութեան կազմակերպութեամբ։ Այս մասին կը հաղորդէ «Ազատ օր»-ը։
Երաժշտական յայտագիրը ներկայացուց Հայաստանէն յատկապէս հրաւիրուած NOUR BAND նուագախումբը՝ Ճորճ Սարգիսեանի, Շանթ Դանիէլեանի եւ Սարգիս Ադամեանի մասնակցութեամբ։
Հայրենակիցներու աննախընթաց մեծ թիւ մը համախմբած ընդարձակ դաշտը գեղեցկօրէն զարդարուած էր Եռագոյն երկար դրօշակով, որ լրիւ կը տիրապետէր սրահի տարածքին, եւ սեղաններուն վրայ զարդարուած ծաղկեփունջերով։ Հայրենակիցներ եւ ընտանիքներ, Հ.Մ.Ը.Մ.ի եւ Յ.Ե.Մ.ի մեծ ընտանիքներու հաւատարիմ բարեկամներ, ինչպէս նաեւ մեծ թիւով երիտասարդներ եւ զոյգ խորհրդաժողովներու մասնակից երիտասարդ պատուիրակները, բացառիկ ուրախ մթնոլորտի մէջ տօնակատարեցին Մայիսեան յաղթանակներուն նուիրուած հայութեան մեծ տօնը։
Ներկայ եղան Յունաստանի թեմակալ Առաջնորդ Գերշ. Տ. Գեղամ Արք. Խաչերեան, Յունաստանի մօտ ՀՀ դեսպան Ֆադէյ Չարչօղլեան, Հայ Կաթողիկէ համայնքի ղեկավար Յովսէփ Ծ. Վրդ. Պէզազեան, Հայ Աւետարանական համայնքի Վերապատուելի Վիգէն Չոլաքեան, Նէոս Գոզմոս (Ֆիքսի) «Ս. Կարապետ» եկեղեցւոյ հոգեւոր հովիւ Տ. Նարեկ Քհնյ. Շահինեան, Հ.Մ.Ը.Մ.ի Կեդրոնական Վարչութեան լրիւ կազմը, Յունահայոց Ազգային Վարչութիւնն ու Հ.Յ.Դ. Յունաստանի Կեդրոնական Կոմիտէն, Հ.Մ.Ը.Մ.ի, Հ.Կ. Խաչի, «Համազգային»ի Շրջանային Վարչութիւններու կազմերը եւ անդամները։
Թամատայի պարտականութիւնը խանդավառութեամբ կատարեց ընկ. Յովիկ Պապօղլեան, որ ողջունեց բոլորի ներկայութիւնը, յատկապէս նման բացառիկ ու եզակի առիթով, երբ մէկ յարկի տակ կը մէկտեղուին Հ.Մ.Ը.Մ.ի եւ Հ.Յ.Դ. Երիտասարդական Միութեան այսքան կարեւոր ժողովներու մասնակցող երիտասարդները։ Մեր ժողովուրդի հեռաւոր թէ մօտիկ անցեալի յաղթանակները յիշելու եւ անոնցմով վերանորոգուելու՝ Մայիս 1918ի մեր հայրենիքի անկախութեան եւ Մայիս 1992ին Շուշիի ազատագրութեան զոյգ տօները հպարտութիւն առթող եւ պատգամներ փոխանցող իրենց խորին խորհուրդներով, միշտ այժմէական ու զօրաւոր պատգամախօսները կը մնան մեր ազգի պատմութեան մէջ։
Խօսքերով հանդէս եկան Հ.Մ.Ը.Մ.ի Յունաստանի Շրջանային Վարչութեան կողմէ ընկ. Մարլէն Տաքէսեան եւ Հ.Յ.Դ. Երիտասարդական Միութեան Կեդրոնական Վարչութեան անունով ընկ. Լոռի Գույումճեան, անդրադառնալով միութենական նախաձեռնութիւններուն եւ ողջունելով խորհրդաժողովներու կայացումը Աթէնքի մէջ։
Շուրջ երեք ժամ տեւած երգահանդէսի բաժինը իրագործուեցաւ հայրենի «Նուր Պանտ» նուագախումբի տաղանդաւոր ելոյթներով, ազգային-յեղափոխական երգերու ճոխ երգացանկով, անդադար իրար յաջորդող բոլորին ծանօթ երգերու մեկնաբանութեամբ, որ եռանդուն ու խանդավառ մթնոլորտ ստեղծեցին ներկաներուն մօտ, որոնք ծափերով ընկերացան եւ երգերուն ձայնակցեցան, իսկ երիտասարդները անդադար պարելով, բեմին առջեւ կանգնած՝ խանդավառ իրենց եռանդը փոխանցեցին բոլորին։
«Նուր Պանտ»ի արուեստագէտներու կողմէ հրամցուած երգերուն, բարձրաձայն երգելով միացան հանդիսատեսները։
«Նուր Պանտ»ի երեք տաղանդաւոր երաժիշտները ծանօթ դարձած են մեր գաղութին մէջ, նախապէս իրենց ունեցած ելոյթներու ընձեռած առիթներուն ընդմէջէն եւ սիրուած ու յարգուած են յունահայ գաղութին կողմէ։
Իր պատգամը փոխանցելու հրաւիրուեցաւ Յունահայոց թեմակալ առաջնորդ Գերշ. Տ. Գեղամ Արք. Խաչերեան, որ ներշնչուած խօսքերով անդրադարձաւ զոյգ միութիւններու փառապանծ ճանապարհին, անոնց ձեւաւորած համահայկական աւանդին ու փոխանցած ժառանգութեան, շեշտելով հայ երիտասարդութեան մեծ դերակատարութիւնը անոնց յարատեւման մէջ։ Սրբազան հայրը իր անմիջական ու պարզ ոճով՝ մեծապէս ոգեւորեց ներկաները։
Կարճ խօսքերով հանդէս եկան Հ.Մ.Ը.Մ.ի Կեդրոնական Վարչութեա ատենապետ եղբ. Գառնիկ Մկրտիչեան եւ Հ.Յ.Դ. Յունաստանի Կեդրոնական Կոմիտէի ներկայացուցիչ ընկ. Սերգօ Գույումճեան, համահայկական ծանրութիւն պարունակող զոյգ խորհրդաժողովներու կայացման անդրադառնալով։ Եղբ. Գառնիկ մեծ ուրախութեամբ յայտարարեց, թէ յառաջիկայ Յուլիսին պիտի սկսի գործել Ստեփանակերտի մէջ Հ.Մ.Ը.Մ.ի նորաստեղծ մասնաճիւղը, միանալով համասփիւռ Հ.Մ.Ը.Մ.ական ցանցին եւ իր կարեւոր նշանակութիւնը բերելով միութեան աշխատանքներուն։
Ընկ. Սերգօ շեշտեց հայ երիտասարդները համախմբող երկու միութիւններու գործակցութեան այս եզակի պարագան, որ ուժերը կազմակերպելու փայլուն օրինակ կը հանդիսանայ։
Պարերը, երգերը, համախումբ պարուած քոչարիները՝ դեռ բեմին շուրջը մինչեւ ուշ ժամեր պահեցին խանդավառ երիտասարդները, որոնք իրենց երկիրները պիտի մեկնին յառաջիկայ օրերուն, մտքերուն ու սրտերուն մէջ որպէս թանկագին գանձ պահելով անցած օրերը։