ՀՀ Նոր Խորհրդարանը Պիտի Ունենայ 132 Պատգամաւոր
Հայաստանի Հանրապետութեան ԱԺ ընտրութիւններու նախնական արդիւնքներուն համաձայն, Հայաստանի նոր խորհրդարանը պիտի ունենայ 132 պատգամաւոր, մինչդեռ գործող խորհդրարանի պատգամաւորներուն թիւը 105 է:
Ըստ megainfo.am-ի՝ պատճառն այն է, որ «Իմ քայլը» ստացած է ձայներու աւելի քան 70 տոկոսը, մինչդեռ Ընտրական օրէնսգիրքը կը պահանջէ, որ Ազգային ժողովին մէջ ընդդիմութիւնը չի կրնար 1/3-էն պակաս իրաւագիր ունենալ: Հետեւաբար, ԱԺ անցած միւս երկու ուժերը լրացուցիչ իրաւագրեր պիտի ստանան, մինչեւ անոնց ներկայութիւնը ԱԺ-ի մէջ կազմէ 1/3:
Հաշուարկներուն իբրեւ արդիւնք կը պարզուի, որ «Իմ քայլը» դաշինքը կը ստանայ 84 իրաւագիր, նաեւ ըստ Տոնթի բանաձեւին՝ «Իմ քայլը» դաշինքին բաժին կը հասնին ազգային փոքրամասնութիւններուն հասնող 4 իրաւագրերը:
Այսպիսով «Իմ քայլը» դաշինքը ԱԺ-ի մէջ կ’ունենայ 88 իրաւագիր:
Ըստ նախնական հաշուարկի՝ ԱԺ անցած միւս երկու ուժերէն ԲՀԿ-ն պէտք է ունենար 10, իսկ «Լուսաւոր Հայաստան»-ը 7 իրաւագիր, սակայն անոնք պիտի ստանան լրացուցիչ իրաւագրեր:
Այսպիսով, ԱԺ-ի մէջ իրաւագրերը պիտի բաշխուին հետեւեալ ձեւով.
«Իմ քայլը» – 88 իրաւագիր
ԲՀԿ – 26 իրաւագիր
«Լուսաւոր Հայաստան» կուսակցութիւնը – 18 իրաւագիր: