Այսօր Մեր Ժողովուրդը Կանգնած Է Արտաքին Եւ Ներքին Մարտահրաւէրների Առջեւ․ Գարեգին Բ․ Ամենայն Հայոց Կաթողիկոս

Ամենայն Հայոց Կաթողիկոս Գարեգին Բ․-ի պատգամը` ուղղուած սփիւռքի զօրաշարժի նուիրուած խորհրդաժողովին (11-12 Ապրիլ 2026, Փարիզ)

Համայն հայութեան հոգեւոր կենտրոն աստուածակառոյց Մայր Աթոռ Սուրբ Էջմիածնից հայրապետական մեր օրհնութիւնն ենք յղում Սփիւռքի զօրաշարժի համաժողովի մասնակիցներիդ: Ողջունում ենք կարեւոր այս նախաձեռնութիւնը, որը կոչուած է քննարկելու մեր ազգի առջեւ ծառացած ծանր ու դժուարին հիմնախնդիրները, յստակեցնելու դրանց դիմագրաւման ուղիներն ու մեր համազգային առաջնահերթութիւնները, վերարժեւորելու Հայաստան-սփիւռք յարաբերութիւնները:

Այսօր մեր ժողովուրդը կանգնած է արտաքին եւ ներքին մարտահրաւէրների առջեւ: Խորը մտահոգութիւն են առաջ բերում` մեր ազգային կեանքում պառակտուածութիւնը, ատելութեան սերմանումը, ազգային կառոյցների թիրախաւորումը, Հայաստան-սփիւռք յարաբերութիւնների խաթարուած վիճակը: Եկեղեցու, հայկական բոլոր կազմակերպութիւնների նպատակը նոյնն է` համախմբել ազգային ներուժը, անվտանգ ու ապահով դարձնել համայն հայութեան հայրենիքը, բարւոքել Հայաստան-սփիւռք գործակցութիւնը, անխաթար պահպանել ազգային ինքնութիւնը:

Համաժողովին մասնակից աւանդական կազմակերպութիւնները, ազգային միութիւններն ու գործիչները, որոնք ներկայացնում են հայութեան տարբեր հատուածներ, մեր Սուրբ Եկեղեցու օրհնութեան ներքոյ անժխտելի ներդրում են ունեցել հայոց անկախ պետականութեան վերականգնման եւ սփիւռքի կենսունակութեան պահպանման նուիրական գործում: Անբեկանելի ճշմարտութիւն է, որ հայութեան եւ հայկականութեան յարատեւութեան երաշխիքը լեզուն, հաւատքը, ազգային դպրոցն է, հայրենի անկախ ու ինքնիշխան պետութիւնը, որի յատուկ հոգածութեան եւ ուշադրութեան ներքոյ պիտի գտնուեն նաեւ սփիւռքը եւ սփիւռքի առաջնային կարիքները: Եւ, հետեւաբար, հայոց պետութեան պահպանութիւնն ու զօրացումը այսօր էլ աշխարհասփիւռ մեր ժողովրդի առաջնային յանձնառութիւնն է: Հարկ է հոգ տանել նաեւ, որ իւրաքանչիւր հայ, չտրուելով օտար գաղափարների եւ ազդեցութիւնների, շարունակի իր ողջ էութեամբ ու հոգով, դաւանած արժէքներով կապուած մնալ իր ազգին ու հայրենիքին եւ իր կարողութիւններն ու շնորհները ի սպաս դնի մեր ժողովրդի եւ հարազատ երկրի առաջընթացին:

Պատմական տարբեր հանգամանքների բերումով աշխարհի տարբեր երկրներում ձեւաւորուած սփիւռքի համայնքների կազմակերպուածութիւնը պէտք է միասնական ուժի եւ զօրութեան վերածենք` յանուն ազգի ու հայրենիքի շահերի պաշտպանութեան: Յիրաւի, տկար կը լինի հայրենիքը` առանց սփիւռքի զօրակցութեան ու նուիրումի, թոյլ ու խոցելի կը լինի սփիւռքը` առանց հզօր ու պայծառ հայոց պետութեան: Միմիայն Հայաստան-սփիւռք փոխադարձ աջակցութեամբ է հնարաւոր հաստատուն ու բարօր պահել մեր ժողովրդի կեանքը` հիմնուած նախնեաց սրբազան ժառանգութեան եւ միեւնոյն արժեհամակարգի վրայ:

Այս առումով, սիրելինե՛ր, կարեւոր առաքելութիւն ունեն Հայաստանեայց առաքելական սուրբ եկեղեցին, ազգային մեր կառոյցներն ու հաստատութիւնները, որպէսզի երբեք չտկարանայ ու չխամրի աշխարհասփիւռ հայորդեաց ազգային-հոգեւոր ինքնութիւնը, եւ անսասան մնայ հայոց պետութիւնը: Անհրաժեշտ է վերաիմաստաւորել ազգային կեանքի մերօրեայ ընթացքները եւ համախոհութեան մէջ գործուն միջոցներ ձեռնարկել` կասեցնելու հայրենավնաս, ազգակործան երեւոյթները: Այսպիսի համաժողովներն ու խորհրդակցութիւնները կարեւոր քայլ են վերոյիշեալ հիմնախնդիրների յաղթահարման եւ լուծման ճանապարհին:

Զատկական այս օրերին հայրապետիս աղօթքն է, որ Բարձրեալն Աստուած իմաստութիւն շնորհի պետութիւնների ղեկավարներին` խաղաղութիւնը վերահաստատելու աշխարհում եւ մարդկութեան կեանքում: Թող Փրկիչ մեր Տէրը ապահով ու անվտանգ պահպանի հայրենի մեր երկիրը եւ Իր Սուրբ Յարութեան լոյսով պայծառացնի համայն մեր ժողովրդին` անշեղօրէն ընթանալու աստուածահաճոյ, բարեբեր ուղիներով եւ տէրունաւանդ հաւատով կերտելու հայոց նորոգեալ կեանքն ու լուսաւոր գալիքը:

Մեր գնահատանք ենք բերում համաժողովի աշխատանքների կազմակերպիչներին ու բոլոր մասնակիցներին եւ մաղթում արդիւնաւոր ընթացք:

Օրհնութեամբ`

ԳԱՐԵԳԻՆ Բ.
ԿԱԹՈՂԻԿՈՍ ԱՄԵՆԱՅՆ ՀԱՅՈՑ