«Նոր Պատերազմ՝ Նոր Տարածքներ». Դաւիթ Տօնոյեան
Ըստ «Ամերիկայի Ձայն»-ին՝ Նիւ Եորքի մէջ հայ համայնքին հետ հանդիպման ընթացքին Լեռնային Ղարաբաղի տագնապին մասին խօսելով՝ Հայաստանի պաշտպանութեան նախարար Դաւիթ Տօնոյեան յայտարարեց, թէ ինք կը փոխէ «Տարածքներ՝ խաղաղութեան դիմաց» ձեւաչափը:
«Ես՝ իբրեւ պաշտպանութեան նախարար, կ՛ըսեմ՝ «Տարածքներ՝ խաղաղութեան դիմաց» ձեւաչափը վերաձեւակերպած եմ, մենք հակառակը պիտի ընենք՝ «Նոր պատերազմ՝ նոր տարածքներու դիմաց» ձեւաչափով գործելով», ըսաւ ան:
«Մենք այդ խրամատային վիճակէն, անընդհատ պաշտպանական կացութեան մէջ ըլլալէ պիտի ձերբազատինք: Պիտի աւելցնենք թիւը այն ստորաբաժանումներուն, որոնք ռազմական գործողութիւնները կրնան տեղափոխել հակառակորդի տարածք», նշեց Տօնոյեան:
Նախարարը հայ համայնքին հետ հանդիպման ընթացքին ամերիկահայերուն ներկայացուց նաեւ բանակին մէջ տիրող իրավիճակը՝ հաստատելով, որ բանակին մէջ մահացութեան աստիճանը պէտք է անպայման նուազեցնել, թէեւ անկարելի է բոլորովին վերացնել զայն: «Անխուսափելի է՝ զէնքով են, երիտասարդ են», յայտնեց ան:
Դաւիթ Տօնոյեան ընդգծեց, որ պէտք է պայքարիլ ոճրային բարքերու դէմ, որոնց դրսեւորումներէն մէկը բացայայտուած է Մեղրիի զօրամասերէն մէկուն մէջ. «Զօրամասին մէջ այնքան լկտիացած էին, որ կանեփ կ՛աճեցնէին», ըսաւ ան: