Ալեքսիս Օհանեան եւ Acer-ի Հիմնադիրը Պիտի Մասնակցին Երեւանի Մէջ Կայանալիք ՏԱ Համաշխարհային Համաժողովին
Reddit կայքի հայ հիմնադիր Ալեքսիս Օհանեան եւ Acer-ի հիմնադիր Սթեն Շին հաստատած են իրենց մասնակցութիւնը Հոկտեմբեր 6-էն 9 Երեւանի մէջ կայանալիք «Տեղեկատուական արհեստագիտութիւններու (ՏԱ) համաշխարհային համաժողով»-ին:
Այս մասին կը յայտնէ ՀՀ կառավարութեան «Ֆէյսպուք»-ի պաշտօնական էջը:
2019 համաժողովի խորագիրն է «Ապակեդրոնացման ուժը»:
«Մենք պիտի քննարկենք ՏԱ ոլորտի զարգացման ապագայ հինգ տարիներու տեսլականը: Խելացի քաղաքի լուծումներ տարբեր երկիրներու օրինակով, համացանցի անվտանգութիւն, եւ այն բոլոր ՏԱ ուղղութիւնները, որոնք այսօր աժմէական են: Քննարկումներու շրջանակը լայն պիտի ըլլայ, եւ պիտի մասնակցին ոլորտի ամենայայտնի մասնագէտներ»,- նշած է համաժողովի նախագահ Ալեքսանդր Եսայեան:
Համաժողովին մասնակցութեան բանաւոր համաձայնութիւններ տուած են Amazon-ի, Google-ի, Facebook-ի ղեկավարները:
Համաժողովը տեղի կ՛ունենայ 1978 թուականէն ի վեր` երկու տարին մէկ անգամ: