Արաբական Միացեալ Էմիրութեանց, Քաթարի Եւ Տարածաշրջանին Մէջ Բնակութիւն Հաստատող Սիրելի Եւ Հաւատաւոր Ժողոդուրդ
Տարածաշրջանը կը գտնուի աննախընթաց կացութեան դէմ յանդիման, վստահ ենք, որ մօտէն կը հետեւիք տեղի ունեցող զարգացումներուն:
Առ այդ՝ մեր թելադրութիւնն է, որ հետեւիք իշխանութիւններու կողմէ պաշտօնապէս հրապարակուած ցուցմունքներուն, առանց խուճապի մատնուելու: Սրբազան հայրը մնայուն կապի մէջ է փոքրամասնութիւններու պետական գրասենեակին հետ եւ ամէն ինչ բնական ընթացքի մէջ կը գտնուի, հետեւաբար առօրեայ կեանքը շարունակելու եւ բնական ընթացքը պահելը թելադրելի է:
Այս առումով կու գանք մեր թեմի Հոգեւոր Դասուն եւ Ազգային Իշխանութեան աջակցութիւնը եւ զօրակցութիւնը յայտնելու մեր ժողովուրդի զաւակներուն: Ինչպէս նաեւ մեր ամբողջական վստահութիւնը յայտնելու երկրի խոհեմ եւ իմաստուն իշխանութեանց ղեկավարութեան ապահովական տարած մեծ աշխատանքներուն ու ջանքերուն: Ներկայ մարտահրաւէրները յաղթահարելու, խաղաղութիւն եւ ապահովութիւն շնորհելու բոլոր քայլերը ապահովուած են տարածաշրջանէն ներս եւ կենցաղային անհրաժեշտ կարիքները ապահովուած են:
Առ այդ՝ կ’աղօթենք Ամենակալ ու Բարձրեալն Աստուծոյ, որ իր երկնային օրհնութեամբ պահէ ու պահպանէ Արաբական Միացեալ Էմիրութիւնները, Քաթարը եւ Ծոցի բոլոր երկիրները եւ ապահովութեամբ բարեզարդէ մեր ժողովուրդի կեանքը:
Դիւան Ազգային Առաջնորդարանի