Խարդաւանքներով, Սպառնալիքներով եւ Բռնաճնշումներով Հնարաւոր Չէ Ընկճել Հոգեւոր Սպասաւորներն ու Հաւատաւոր Ժողովուրդը․Մայր Աթոռ

Սոյն թուականի Հոկտեմբեր 15-ի լուսադէմին, իրաւապահ համակարգի ներկայացուցիչները Արագածոտնի թեմի Յովհաննավանքի սպասաւոր Տ․ Արամ քհն․ Ասատրեանի հրապարակած սուտ տեղեկութիւններուն եւ «Իրազեկ Քաղաքացիների Միաւորում» ՀԿ նախագահ Դանիէլ Իոաննիսեանի հաղորդման հիման վրայ խուզարկութիւններ իրականացուցած են Արագածոտնի թեմի առաջնորդարանին մէջ, Արագածոտնի թեմի առաջնորդ Գերշ․ Տ․ Մկրտիչ եպս․ Պռոշեանի եւ Արագածոտնի թեմի քահանաներու եւ աշխատակիցներու բնակարաններուն մէջ։ Այս մասին յայտարարութիւն տարածած է Մայր Աթոռ Սուրբ Էջմիածինը, որուն մէջ կը նշուի․

«Այս պահին յայտնի տեղեկութիւններով բերման են ենթարկուել Արագածոտնի թեմի առաջնորդը, թեմի 12 քահանաներ՝ Արժ․ Տ․ Փառեն քհն․ Առաքելեանը, Արժ․ Տ․ Հայկ քհն․ Քոչարեանը, Արժ․ Տ․ Մկրտիչ քհն․ Երանեանը, Արժ․ Տ․ Մանուկ քհն․ Զէյնալեանը, Արժ․ Տ․ Ղեւոնդ քհն․ Գափոյեանը, Արժ․ Տ․ Հայկ քհն․ Սահակեանը, Արժ․ Տ․ Սարգիս քհն․ Սարգսեանը, Արժ․ Տ․ Գարեգին քհն․ Արսէնեանը, Արժ․ Տ․ Նարեկ քհն․ Սարգսեանը, Արժ․ Տ․ Օշին քհն․ Հայրապետեանը, Տ․ Վրթանէս քհն․ Բաղալեանը, Արժ․ Տ․ Համբարձում քհն․ Դանիէլեանը, Արագածոտնի թեմի հաշուապահը, գանձապահը եւ գործավարը։

Օրէնքի կոպտագոյն ոտնահարմամբ ժամեր շարունակ ծածուկ է պահուել Արագածոտնի թեմի առաջնորդ Գերշ․ Տ․ Մկրտիչ եպս․ Պռոշեանի, Արժ․ Տ․ Սարգիս քհն․ Սարգսեանի, Արժ․ Տ․ Նարեկ քհն․ Սարգսեանի, Արժ․ Տ․ Օշին քհն․ Հայրապետեանի, Արժ․ Տ․ Համբարձում քհն․ Դանիէլեանի, Տ․ Վրթանէս քհն․ Բաղալեանի պահման վայրը, եւ նրանք զրկուած են եղել իրաւական աջակցութիւն ստանալու որեւէ հնարաւորութիւնից։

Արագածոտնի թեմի առաջնորդի, թեմում ծառայող քահանաների եւ աշխատակիցների նկատմամբ իրականացուած ապօրինի քրէական հետապնդման գործողութիւնները հերթական դրսեւորումն են իշխանութիւնների հրահրած հակաեկեղեցական համակարգուած արշաւի։

Նմանօրինակ դատապարտելի գործողութիւններով ակնյայտ չարամիտ դիտաւորութիւն է հետապնդւում խափանելու Եկեղեցու բնականոն գործունէութիւնը, հարուածելու Եկեղեցու հեղինակութեանը եւ վախի ու տագնապի մթնոլորտ տարածելու հոգեւորականների, հաւատացյալների ու հանրութեան լայն շրջանակներում։

Հակաօրինական այս գործողութիւնների պատճառով խոչընդոտուել է թեմի գործունէութիւնն ու ծիսա-արարողական կեանքը, խաթարուել հոգեւոր հովիւների ծառայութիւնը։

Ամբողջատիրական համակարգերին բնորոշ նմանօրինակ բռնաճնշումների կիրառմամբ ՀՀ իշխանութիւնները կոպտօրէն ոտնահարում են կրօնական ազատութեան իրաւունքը, վիրաւորում հաւատացեալների կրօնական զգացումները, շարունակում տարածել ատելութիւն՝ խորացնելով հանրային պառակտումը։

Մեր հոգևորականներին եւ հաւատացեալ ժողովրդին կոչ ենք ուղղում չտրուել սադրանքներին, ամուր մնալ Եկեղեցու պաշտպանութեան դիրքերում։

Խարդաւանքներով, սպառնալիքներով եւ բռնաճնշումներով հնարաւոր չէ ընկճել հոգեւոր սպասաւորներին եւ հաւատաւոր ժողովրդին։

Աղօթում ենք հայրենի մեր երկրի խաղաղութեան եւ մեր ժողովրդի անվտանգ կեանքի համար»։

Ամբողջական հոդվածը կարող եք կարդալ այս հասցեով՝ https://yerkir.am/hy/article/2025/10/15/300788