Արցախի Հայ Բնակչութեան Նկատմամբ Իրականացուած Ցեղական Զտումը Միջազգային Հանրութեան Ուշադրութիւնն ու Գործողութիւնը Կը Պահանջէ. Յայտարարութիւն
«Սատար Արցախին ֆրանսահայ միութիւն»-ը կը վերահաստատէ իր անսասան նուիրուածութիւնը հայոց Պետութեան անկախութեան։ Անկախ Հայաստանի ստեղծումը եղած է հիմնարար ուղենիշ եւ ներշնչման աղբիւր աշխարհի բազմաթիւ սփիւռքահայերու համար»։ Այս մասին միութիւնը տարածած է յայտարարութիւն, ուր կ՝ըսուի․
«Հենց այս նուիրուածութիւնից ելնելով է, որ մենք այսօր խորը վերապահումով ենք արձագանգում Հայաստանի Հանրապետութեան վարչապետ Նիկոլ Փաշինեանի վերջին յայտարարութիւններին, որոնցով արցախահայերին կոչ է արւում հրաժարուել իրենց պատմական հայրենիք վերադառնալու իրաւունքից։
Պէտք է յիշեցնել, որ Ղարաբաղեան հակամարտութիւնը չի ծնուել տարածքային հաւակնութիւններից, այլ եղել է արցախահայութեան արդար պայքարը՝ պաշտպանելու իր հիմնարար իրաւունքները՝ պաքուի իշխանութիւնների կողմից տարուող խտրականութեան, բռնութիւնների եւ հայատեաց քաղաքականութեան դէմ։ Այդ իրաւունքները ոչ մի կերպ չեն կարող աստիճանակարգուել կամ համարուել երկրորդական։
Մարդու իրաւունքների պաշտպանութիւնն ու երաշխաւորումը պէտք է լինեն անկախ ու ինքնիշխան պետութեան առաջնահերթութիւններ։ Այդ իրաւունքները երկրորդ փլան մղելը ոչ թէ զօրացնում, այլ էապէս թուլացնում է ազգային համերաշխութիւնը։ Ոչ մի քաղաքական պատճառ չի կարող արդարացնել մարդկանց հիմնարար իրաւունքների զոհաբերումը։ Այդ իրաւունքները գոյութիւն ունեն անկախ քաղաքական ռեժիմներից կամ ուժերի յարաբերակցութիւնից։ Եթէ ազրպէյճանը հրաժարւում է յարգել այդ իրաւունքները, ապա այդ երկիրն է, որ պէտք է համակերպուի միջազգային իրաւունքի նորմերին, ոչ թէ Հայաստանը հրաժարուի դրանց պաշտպանութիւնից։
Մենք գիտակցում ենք, որ Հայաստանի իշխանութիւնների վրայ դրուած է ծանր պատասխանատուութիւն՝ ապահովելու տեւական խաղաղութիւն եւ արժանավայել վերաբերմունք Արցախի բռնի տեղահանուածների նկատմամբ։ Բայց որեւէ խաղաղութիւն չպէտք է կառուցուի հայ ժողովրդի մի հատուածի հիմնարար իրաւունքների ժխտման հիման վրայ, որոնք յստակ ճանաչուել են Միջազգային արդարադատութեան դատարանի կողմից։
Սեփական ժողովրդին ծառայող, անկախ եւ ինքնիշխան հայկական պետութեան առաջնային առաքելութիւններից է պաշտպանել հայ ժողովրդի իրաւունքները:
Հետեւաբար, մենք կրկին հաստատում ենք, որ արցախահայութեան իրաւունքները չեն կարող ի չիք դառնալ։ Արցախի հայ բնակչութեան նկատմամբ իրականացուած էթնիկ (ցեղական) զտումը պահանջում է միջազգային հանրութեան ուշադրութիւնն ու գործողութիւնը։ Հաւատարիմ մնալով մեր յանձնառութեանը՝ մենք շարունակելու ենք մեր գործունէութիւնը եւ կոչ ենք անում Հայաստանի ու սփիւռքի բոլոր ուժերին միաւորել ջանքերը՝ պաշտպանելու Արցախահայերի հիմնարար իրաւունքները»։