Ստեփանակերտի Յիշաարժան Արուեստի Կոթողներու Պատկերազարդ Թուային Ցանկ Պիտի Ստեղծուի
Արցախի Զբօսաշրջութեան եւ մշակոյթի զարգացման գործակալութիւնը նախաձեռնած է նոր՝ թշնամի ազրպէյճանի կողմէ գրաւուած Արցախի Հանրապետութեան մայրաքաղաք Ստեփանակերտի յիշատակելի արուեստի կոթողներու հաշուառման նախագիծ: Նախագիծով կը նախատեսուի ստեղծել Ստեփանակերտ քաղաքի յիշատակելի արուեստի կոթողներու հնարաւորինս ամբողջական պատկերազարդ թուային ցանկ:
«Մենք տեսնում ենք, թէ ինչպիսի արագ տեմպերով (քայլերով, «ԵՌԱԳՈՅՆ») ազրպէյճանը ոչնչացնում է հայկական յուշարձանները, մոնումենտալ (յիշարժան, «ԵՌԱԳՈՅՆ») արուեստի կոթողները։ Այս նախագծով փորձում ենք հաւաքագրել Ստեփանակերտում տեղադրուած կոթողների ցանկերը»,- Panorama.am-ի հետ զրոյցի մը ընթացքին ըսած է նախաձեռնութեան հեղինակ, Արցախի Հանրապետութեան մշակոյթի, երիտասարդութեան հարցերու եւ զբօսաշրջութեան նախկին նախարար, Արցախի բռնագրաւուած տարածքներուն մէջ մշակութային ժառանգութեան պահպանութեան պետական խորհուրդի քարտուղար Սերգէյ Շահվերդեան։
Ցանկին մէջ իւրաքանչիւր կոթող պիտի ունենայ իր հեղինակին անունը, տեղադրման ամսաթիւը, որուն յիշատակին կառուցուած է եւ գտնուելու վայրը:
«Այդ ցանկերի ստեղծմամբ մենք փորձում ենք հնարաւորինս ապահովել այդ կոթողների պահպանութիւնը, փորձում ենք ամէն դէպքում մեր միջավայրի յիշողութիւնը պահպանել հանրութեան մէջ»,- ըսած է ան։
Նախագիծին ծիրէն ներս կը հաւաքագրուին Ստեփանակերտի տարբեր թաղամասերու մէջ տեղադրուած ցայտաղբիւրներու, արձաններու, տարբեր առիթներով ստեղծուած կոթողներու, հարթաքանդակներու լուսանկարները:
«Մենք ունենք մեծ քանակութեամբ նոր ձեւաւորուած մոնումենտալ արուեստի արձանների խմբաքանակ՝ 2020 թուականի պատերազմի ընթացքում զոհուած զինծառայողների յիշատակին կառուցուած կոթողները։ Դա մեր աշխատանքի շատ մեծ ու կարեւոր մասը կը լինի ոչ միայն, որովհետեւ դրանք մոնումենտալ արուեստի դրսեւորումներ են, նաեւ յաւերժացնելու այն մարդկանց անունները, որոնք զոհուել են պատերազմների ընթացքում»,- ըսած է Ս. Շահվերդեան։
Ան նշած է, որ իրենք պիտի հրապարակեն այդ ցանկերը, պիտի տրամադրեն Հայաստանի պատկան մարմիններուն՝ միջազգային յարաբերութիւններու մէջ օգտագործելու նպատակով։