![](http://yerakouyn.com/wp-content/uploads/2024/07/d708026e850a8e5176188e50047aea41_1720019425-730x411.jpg)
ազրպէյճանը Աննախադէպ Խախտում Կատարած է. Խոշտանգումներու Կանխարգիլման Եւրոպական Կոմիտէ
Եւրոպայի խորհուրդին կից Խոշտանգումներու եւ անմարդկային կամ արժանապատուութիւնը նուաստացնող վերաբերմունքի կամ պատիժի կանխարգիլման եւրոպական կոմիտէն հրապարակած է ազրպէյճանի վերաբերեալ հրապարակային յայտարարութիւն։ Այս մասին կը հաղորդէ «ԵՐԿԻՐ»-ը։
«Այս յայտարարութիւնը, որ եղած է Կոմիտէի ստեղծման մասին Համաձայնագրի 10-րդ յօդուածին համաձայն, կը վերաբերի ազրպէյճանի իշխանութիւններուն կողմէ ԽԿԿ-ի հետ համագործակցութեան մշտական բացակայութեան:
Հրապարակային յայտարարութիւն ընելու այս բացառիկ որոշման պատճառը ազրպէյճանական իշխանութիւններուն ուղղակի հրաժարումն է ԽԿԿ-ի հետ համագործակցութենէն։ Կոմիտէն անկեղծ փորձեր ըրած է կառուցողական երկխօսութեան մէջ մտնելու ազրպէյճանի իշխանութիւններուն հետ՝ լուծելու այն խնդիրները, որոնք հիմքը կը կազմեն ԽԿԿ-ի գոյութեան: Իր զեկոյցներուն մէջ ան մանրամասնած է, որ շարունակած է ոստիկանութեան աշխատակիցներուն կողմէ վատ վերաբերմունքի եւ նոյնիսկ խոշտանգումներու մեղադրանքներ ստանալ:
Այնուամենայնիւ, ազրպէյճանի ՆԳՆ-ն որեւէ քայլ չէ ձեռնարկած՝ կեանքի կոչելու Կոմիտէին վաղեմի յանձնարարականները՝ դադրեցնելու նման գործելաոճը: Բացի այդ, կոմիտէն չէ ստացած նամակներու պատասխաններ, որոնցմով խնդրած են դիւրացնել երկխօսութիւնը պաքուի մէջ բարձր մակարդակի բանակցութիւններու միջոցով կամ նոյնիսկ ազրպէյճանի իշխանութիւններուն այցի մասին ծանուցելէ ետք: Ասիկա Համաձայնագրի հիմնարար եւ աննախադէպ խախտում է։
Հաշուի առնելով իրաւապահներուն կողմէ կալանաւորներու նկատմամբ վատ վերաբերմունքի եւ նոյնիսկ խոշտանգումներու հետ կապուած խնդիրներուն լրջութիւնը՝ ԽԿԿ-ն նաեւ որոշած է հրապարակել 2022 թուականին ազրպէյճան կատարած յատուկ այցին զեկոյցը՝ որպէս հրապարակային յայտարարութեան յաւելուած։
Ինչպէս կը նշուի յայտարարութեան մէջ, կոմիտէն յոյս ունի, որ համագործակցութեան բացակայութիւնը չի յանգեցներ ազրպէյճանի իշխանութիւններուն հետ յարաբերութիւններու մշտական խզման։ ԽԿԿ-ն պատրաստ է աջակցելու իշխանութիւններուն՝ վճռական քայլեր ձեռնարկելու՝ պաշտպանելու հիմնարար արժէքները, որոնց հաւատարիմ է ազրպէյճանը՝ որպէս Եւրոպայի խորհուրդի անդամ երկիր։ Իր իրաւագիրին ծիրէն ներս Կոմիտէն լիովին հաւատարիմ է այդ նպատակով ազրպէյճանի իշխանութիւններուն հետ երկխօսութիւնը շարունակելուն»,- նշած է Կոմիտէն: