Ալեքսանտրա Գրիգորեան՝ «Կրան Բրի»-ի Պրոնզէ Մետալակիր

Հայաստանի ծանրամարտի հաւաքականը Տոհայի մէջ կը մասնակցի «Կրան Բրի»-ին, որ վարկանշային է Փարիզի Ողիմպիական խաղերուն համար։ Այս մասին կը յայտնեն ՀՀ ԿԳՄՍ-էն։

Հայաստանի ներկայացուցիչներէն առաջինը պայքարի ելած է երիտասարդներու աշխարհի ոսկի մետալակիր, 55 քկ քաշային Ալեքսանտրա Գրիգորեան: 18-ամեայ մարզուհին երկամարտին ցոյց տուած է 189 քկ արդիւնք եւ դարձած է «Կրան Բրի»-ի պրոնզէ մետալակիր:

Ալեքսանտրա Գրիգորեանը առաջին մետալը նուաճած է մեծահասակներու պայքարին:

Պոկում վարժութեան հայ մարզուհին գլխավերեւը պահած է 81 քկ կշռող ծանրաձողը, իսկ հրում վարժութեան՝ 108 քկ: Ի դէպ, հրում վարժութեամբ Գրիգորեանը գերազանցած է աշխարհի երիտասարդական առաջնութեան ցոյց տուած արդիւնքը: Երկու վարժութիւններուն ալ Գրիգորեանը ցոյց տուած է 4-րդ արդիւնքը:

Կանանց հաւաքականի կազմէն ընդգրկուած են նաեւ Լիանա Գիւրջեանը (81 քկ), Տաթեւ Յակոբեանը եւ Հռիփսիմէ Խուրշուդեանը (երկուքն ալ՝ 87 քկ):

Տոհայի մէջ ընթացող ծանրամարտի «Կրան Բրի»-ն կը շարունակուի մինչեւ Դեկտեմբեր 14: