Արամ Ա․ Վեհափառ Հայրապետը Մօտէն Կը Հետեւի Սուրիոյ Մէջ Երկրաշարժին Յառաջացուցած Մարդկային եւ Նիւթական Վնասներուն
Երկուշաբթի, 6 Փետրուար 2023-ին, ամբողջ օրը, Ն.Ս.Օ.Տ.Տ. Արամ Ա. Վեհափառ Հայրապետը Սուրիոյ հայ համայնքի հոգեւոր ու աշխարհական պատասխանատուներուն հետ մնայուն կապի մէջ եղաւ՝ մօտէն հետեւելով երկրաշարժին յառաջացուցած վնասներուն ու աւերներուն։
– Ստացուած տեղեկութիւններուն համաձայն, ցարդ ունինք չորս զոհ. յատկապէս Հալէպի մէջ արձանագրուած են բաւական նիւթական վնասներ։ Լաթաքիոյ եւ Քէսապի վնասները յարաբերաբար աւելի նուազ են։
– Հալէպի մէջ Ազգային Առաջնորդարանը եւ համայնքի ղեկավարութիւնը պատրաստած են եօթը յատուկ կեդրոն, որպէսզի ժողովուրդը ապաստան գտնէ աւելի ապահով պայմաններու մէջ։
– Մեր Ս. Աթոռին կողմէ, Վեհափառ Հայրապետը գումար մը յատկացուց Հալէպի հայութեան, յիշեալ կեդրոններուն մէջ ապաստան գտած մեր ժողովուրդի զաւակներուն սննդաբաշխումի աշխատանքներուն համար։
– Նորին Ս. Օծութիւնը յատուկ նամակ յղեց Սուրիոյ Հանրապետութեան նախագահ տոքթ. Պաշշար Ալ-Ասատին՝ իր ցաւակցութիւնն ու զօրակցութիւնը յայտնելով Սուրիոյ ժողովուրդին։