Փաշինեան Կը Վախնայ Դիմադրող Հայ Երիտասարդութենէն․ Յովսէփ Տէր Գէորգեան
Նիկոլ Փաշինեան, հաւատարիմ իր ազգակործան քաղաքականութեան, անշեղօրէն կը շարունակէ իր աղետալի ընթացքը հաւասարապէս արտաքին եւ ներքին մակարդակներու վրայ։
Ազերիէն ու Թուրքէն խաղաղութիւն մուրացող Փաշինեան, սլաքները լարած է դիմադրող հայ երիտասարդութեան դէմ, որմէ այնքան կը վախնայ և ստոր քայլերով կը յաւակնի զայն լռեցնել, թուլացնել և չէզոքացնել:
Ամիսներ առաջ կ՛արգիլուէր Հ.Յ.Դ. ղեկավարներու և Հ.Յ.Դ. Հոլանտայի «Գարեգին Նժդեհ» երիտասարդական միութեան անդամ Սիւնէ Աբրահամեանի մուտքը Հայաստան։ Այս անգամ, Ֆրանսայի «Հ.Յ.Դ. Նոր Սերունդ» երիտասարդական միութեան ատենապետ Նժդեհ Գարագաւորեանի մուտքի արգիլումով, Փաշինեան կը փորձէ հարուածել Հայաստանի, Արցախի և Սփիւռքի տարածքին յանուն Արցախի՝ թուրքին և ազերիին դէմ պայքարող հիմնական երիտասարդական կազմակերպութեան։
Ընդլայնելով ծիրը, կ՚արժէ քննել հայ երիտասարդութեան նկատմամբ Նիկոլ Փաշինեանի կիրարկած քաղաքականութիւնը, և այս ուղղութեամբ իր գործած անհամար սխալներն ու դաւադրական քայլերը աւելցնել իր այնքան հարուստ ամբաստանագրին վրայ:
Անառարկելի է որ Փաշինեանը ամէն գնով կը փորձէ բթացնել Հայ երիտասարդութեան զգօնութիւնը, դիմադրողականութիւնը եւ պայքարելու կամքը:
Օրինակները շատ են. Զարեհ Սինանեան կոչեցեալի անհեթեթ ծրագիրներու միջոցաւ, ան կը փորձէ սփիւռքի երիտասարդութիւնը պառակտել, և ուռուցիկ հանգամանքներով ու “նորարար” դաստիարակութեամբ անոնց մէջ սերմանել ապազգային տրամադրութիւններ:
Ասոր զուգահեռ, Փաշինեան կազմաքանդեց և կը շարունակէ թուլացնել Հայկական բանակը, եւ այնպիսի վիճակ կը ստեղծէ, որ հայրենիքի ապահովութեան ծառայելը պատուհաս նկատուի երիտասարդութեան կողմէ: Վկայ ամբողջ սերունդ մը որ զոհուեցաւ իր սխալ քաղաքականութեան և 44-օրեայ պատերազմը դիտաւորեալ չկազմակերպելու պատճառաւ: Կորուստներու ցանկը կը համալրուի Ազատ գիւղի նորագոյն ողբերգութեամբ։
Նիկոլ Փաշինեանի մասին Արցախի երիտասարդութեան կարծիքին արդեօք կ՚արժէ՞ անդրադառնալ, եւ այդ յարաբերութեան որակին մասին փաստեր ներկայացնել: “Արցախը հայաստան է և վերջ” յայտարարող և իր իւրաքանչիւր խօսքին մէջ հայ երեխաներուն «երջանիկ ապրելու» սուտ խոստումներ տուող խեղկատակը կարո՞ղ է արդեօք ձեռնածուի աճպարարութեամբ համոզել Արցախի երիտասարդութիւնը և 30.000 շրջափակուած երեխաները, որ անոնց երջանկութեան համար ինք իսկապէս մտահոգ է…:
Նիկոլ Փաշինեանի հակադաշնակցական մոլուցքին ի պատասխան, Հ.Յ.Դ. երիտասարդութիւնը իր գործունէութեամբ կը վերահաստատէ որ ՝
– Նիկոլի այս դաւադիր քայլերը զինք պիտի չշեղեն հակաթուրք եւ հակաազերի պայքարէն
– Պիտի շարունակէ գործել ի խնդիր Արցախի եւ Սիւնիքի հզօրացման, և առհասարակ հայաստանի անվտանգութեան ապահովման։
– Այս պայքարի առաւել արդիւնաւէտութեան համար, Նիկոլի հեռացումը կը մնայ հրամայական եւ այս ուղղութեամբ իր աշխատանքը թափով պիտի շարունակուի:
– Բռնաճնշուած ու անիրաւուած Հայաստանի, Արցախի և Սփիւռքի երիտասարդութեան միասնական պայքարը անհրաժեշտ է կասեցնելու ազգի գահավիժումը: Հ.Յ.Դ. Երիտասարդականը ստանձնած այս պատասխանատուութեան իր բաժինը:
Հ.Յ.Դ. Երիտասարդականի բազմաթիւ անդամներու բանտարկութեան, հայրենիք մուտքի արգիլումը, բռնաճնշումի և հալածանքի որոշումները բնաւ պիտի չկասեցնեն այս ընթացքը: