Հայ Դատը Կ՛ուզէ Պայտընի Հետ Քննել Թիւ 907 Յաւելուածին Գործադրութիւնը Պարտադրելու Հարցը
Ամերիկայի Հայ Դատի յանձնախումբի ատենապետ Ռաֆֆի Համբարեան 14 Մարտ թուակիր նամակով մը դիմած է Սպիտակ տան, որպէսզի նախագահ Ճօ Պայտընի հետ ուղղակի հանդիպումով մը կարելի ըլլայ քննել Ազրպէյճանի բռնատիրական կարգերուն ամերիկեան ռազմական օժանդակութիւնները կասեցնելու հարցը, Ազատութեան զօրակցելու բանաձեւի թիւ 907 յաւելուածը գործադրելու միջոցով։
Նշենք, որ Ամերիկայի Հայ Դատի յանձնախումբը նաեւ կոչ կ՛ընէ Քոնկրեսի ղեկավարութեան, որ պարտադրէ Ազրպէյճանին ռազմական աջակցութիւնները կասեցնող թիւ 907 յաւելուածին գործադրութիւնը:
1992-ին վաւերացուած յաւելուածը 2002-էն ի վեր ամբողջութեամբ չի գործադրուիր, որովհետեւ նախագահին տրուած է զայն շրջանցելու իրաւասութիւնը եւ այդ թուականէն ետք բոլոր նախագահները շահագործած են այդ իրաւունքը, որուն պատճառով Ազրպէյճան միայն 2002-2021ի միջեւ ստացած է առնուազն 164 միլիոն տոլարի ռազմական աջակցութիւն:
Նախագահ Պայտըն յառաջիկայ շաբաթներուն այս գծով նոր որոշում մը պիտի տայ, Հայ Դատին հետ երկկողմ հանդիպում մը աւելի կենսական դարձնելով։
Նամակին մէջ կը շեշտուի, որ յատկապէս 44-օրեայ պատերազմին եւ Արցախի ու Հայաստանի վրայ ատրպէյճանական շարունակուող յարձակումներուն լոյսին տակ, Պաքուին ռազմական օժանդակութիւններ տրամադրելու ներկայ ընթացքը պէտք չէ շարունակուի: Հոն նաեւ կը քննադատուի Պաքուի բռնարարքները յստակօրէն չդատապարտելու Ուաշինկթընի կեցուածքը։
Նամակը կարելի է կարդալ կայքէջին վրայ։