Վերին Շորժան Կը Գտնուի Ազրպէյճանական Զինուած Ուժերու Նշանառութեան Տակ․ ՄԻՊ

«Վերին Շորժա գիւղին եւ գիւղի սարատեղիին մէջ փաստահաւաք աշխատանքները կ՝ապացուցեն, որ բնակավայրը կը գտնուի ազրպէյճանական զինուած ուժերու նշանառութեան տակ: Անոնք պարբերաբար կը կրակեն գիւղի եւ քաղաքացիական բնակիչներով բնակեցուած սարատեղիի ուղղութեամբ:

Բացի այն, որ ազրպէյճանական զինուած ուժերը անօրինական տեղակայուած են ՀՀ ինքնիշխան տարածքին վրայ, կը գտնուին ՀՀ բնակիչներուն օրինական փաստաթուղթերով պատկանող հողատարածքներուն վրայ` օրինակ, միայն այս հատուածին մէջ նուազագոյն հաշուարկներով աւելի քան 1,200 հա արօտավայր, 220 հա խոտհարք, 250 հա վարելահող: Այս մասին առկայ են առարկայական ապացոյցներ:

Կը շարունակուին արձանագրուիլ կենդանիներու գողութիւններ ազրպէյճանական զինուած ուժերուն կողմէ, որոնք այդպէս ալ չեն վերադարձուած, նաեւ՝ անոնց կրակոցներէն կենդանիներու սատկելու դէպքեր:

Աւելին, այս տարածքներու անմիջապէս դիմաց գտնուող հողերը նոյնպէս հնարաւոր չըլլար օգտագործել, քանի որ նշանառութեան տակ են ու մարդոց մօտենալու պարագային ազրպէյճանական զինծառայողները կը կրակեն:

Բնակիչները նշած են, որ ազրպէյճանական կրակոցները կը կանխուին շնորհիւ ՀՀ զինուած ուժերու կանխարգելիչ կրակոցներուն, որոնք նպատակ ունին պաշտպանելու մարդոց կեանքն ու առողջութիւնը:

Այսինքն`ազրպէյճանական զինուած ուժերը կը խաթարեն քաղաքացիական բնակիչներու կեանքի իրաւունքն ու առողջութիւնը, մարդոց խաղաղութիւնը, սեփականութեան իրաւունքն ու բնականոն կեանքը, թոյլ չեն տար գիւղատնտեսութեամբ զբաղիլ:

Ազրպէյճանական տեղակայումներն ու նկարագրուած արարքները բացայայտ կ՝ոտնահարեն միջազգայնօրէն երաշխաւորուած մարդու իրաւունքները եւ միջազգային իրաւունքով արգիլուած են:

Այցին արդիւնքները պիտի ներկայացուին միջազգային կառոյցներուն (ՄԱԿ, ԵԽ, ԵՄ եւ այլն), ինչպէս նաեւ ՀՀ պետական համապատասխան մարմիններուն»,-գրած է ՀՀ Մարդու Իրաւունքներու Պաշտպան Արման Թաթոյեան: