Պատերազմի Գերիները Հետապնդելը Միջազգային Ուխտերու Կոպիտ Խախտում Է. Շիֆ

Միացեալ Նահանգներու Ներկայացուցիչներու տան անդամ Էտըմ Շիֆ անդրադարձաւ Ազրպէյճանի մէջ պահուող հայ պատերազմի գերիներուն եւ անոնց դէմ սկսած դատական գործերուն:

Դեմոկրատ քոնկրեսականը ահազանգեց Պաքուի իշխանութիւններուն կողմէ մարդկային իրաւունքներու շարունակուող խախտումներուն մասին:

«Լեռնային Ղարաբաղի մէջ տագնապէն ետք, Ազրպէյճանի կողմէ մարդու իրաւունքներու շարունակական ոտնահարումը անընդունելի է: Պատերազմի գերիները հետապնդելը միջազգային ուխտերու կոպիտ խախտում է եւ Ազրպէյճանի կողմէ մարդկային իրաւունքներու եւ միջազգային իրաւունքի կոպիտ անտեսման վկայութիւն: Մենք կը շարունակենք աշխատիլ հայ պատերազմի գերիները անյապաղ ազատ արձակելու ուղղութեամբ։ Միացեալ Նահանգները պէտք է անհետեւանք չձգէ Ազրպէյճանի կողմէ իրականացուող գործողութիւնները եւ դարձեալ գործի դնէ այն արգելքը, որմով չ՛արտօնուիր Միացեալ Նահանգներու կողմէ ռազմական աջակցութիւնը Պաքուի վարչակարգին: Մենք պէտք չէ արտօնենք, որ Ազրպէյճան անպատիժ խախտէ մարդկային իրաւունքները եւ ոտնահարէ միջազգային արժեչափերը»,- գրած է Շիֆ: