Այս պահուն Մարտերը Թուլացած Են, Զոհեր Չունինք․ Արծրուն Յովհաննիսեան
Ատրպէյճանի սադրիչ գործողութիւններուն հետեւանքով հայ-ատրպէյճանական սահմանին սկսած մարտերը թուլացած են, հայկական կողմը
զոհեր չունի: Ըստ «Եռագոյն»-ի՝ այս մասին «Ֆէյսպուք»-ի իր էջին վրայ յայտնած է Պաշտպանութեան նախարարութեան Վազգէն Սարգսեանի անուան ռազմական համալսարանի
հրամանատարաշտապային բաժանմունքի պետ, ՊՆ նախկին խօսնակ Արծրուն Յովհաննիսեան։
«Մարտերը այս պահուն թուլացած են։ Մենք զոհեր չունինք, հակառակորդը հաստատ զոհեր ունի»,-գրած է Հովհաննիսեանը:
Նախապէս ան մէկ այլ գրութեամբ յայտնած էր, որ «մարտերը կը շարունակուին. ՀՀ Զինուած ուժերը պատասխան կրակով կը լռեցնեն հակառակորդին, մենք զոհեր չունինք»:
Յուլիս 16-ի լոյս գիշերը ժամը մօտ 03:40-ին ՀՀ ԶՈՒ դիրքապահները նկատած են հակառակորդի շարժ: Անցնելով շրջանաձեւ պաշտպանութեան, հայկական ստորաբաժանումները կանխած են հակառակորդին ներթափանցման փորձը: Թէժ մարտէն ետք հակառակորդը, կորուստներ կրելով, ետ շպրտուած է: Այնուհետեւ ատրպէյճանական ստորաբաժանումները ժամը 05:20-ին սկսած են հրետակոծել Այգեպար եւ Մովսէս գիւղերը` կիրառելով ականանետ եւ Տ-30 հաուբից: