Սիմոն Աբգարեան՝ Ֆրանսական Հեղինակաւոր Թատերական Մրցանակաբաշխութեան Յաղթող

«Molieres 2020» ֆրանսական հեղինակաւոր թատերական մրցանակաբաշխութեան, որ երէկ հեռարձակուած է France 2 հեռուստաալիքով, մեր հայրենակից Սիմոն Աբգարեանը ճանչցուած է յաղթող եւ արժանացած երեք «Մոլիեր»-ի: Այս մասին ԵՌԱԳՈՅՆ-ը կը տեղեկանայ Armradio.am-էն։

«Սիմոն Աբգարեանի համար ասիկա մեծ ճանաչում է, որ ցոյց տուաւ, որ ան ոչ միայն գերազանց դերասան է, այլեւ թատերախումբի ղեկավար եւ իսկական գրող»,- ըստ լրատուամիջոցին՝ գրած է Francetvinfo-ն:

Սիմոն Աբգարեան ծնած է 1962-ին, Փարիզ: 1983-85թթ յաճախած է Փարիզի դերասանական արուեստի միջազգային դպրոց:

1993-ին, կնոջ` դերասանուհի եւ բեմադրիչ Քաթրին Շաուպի հետ, Փարիզի մէջ հիմնած է «T.E.R.A.» թատրոնը, ուր բեմադրած է դասական եւ ժամանակակից ներկայացումներ:

2009-ին կերտած է Միսակ Մանուշեանի դերը Ռ.Կէտիկեանի «Յանցագործներու բանակ» ֆիլմին մէջ: Նկարահանուած է նաեւ «Արարատ» (2002թ.), «Ճշմարտութիւն Չարլիի մասին» (2002թ.), «Արամ» (2002թ.), «Այո՛» (2004թ.), «Քազինօ Ռոյալ» (2006թ.), «Բերսեպոլիս» (2007թ.), «Օձը» (2007թ.), «Թարգմանութիւն» (2007թ.), «Շիվա» (2008թ.), «Կատաղութիւն» (2009թ.), «Թուրքի գլուխ» (2010թ.), «Զարաֆա» (2012թ.), «Մարաթօնի մասնակիցները» (2013թ.), «Անժէլիքա, հրեշտակներու մարքիզուհին» (2013թ.), «Սպի» (2014թ.), «Խենթ պատմութիւն» (2015թ.), «1915» (2015թ.) եւ այլ ֆիլմերու մէջ: Կատարած է շարք մը ֆիլմերու կրկնօրինակումներ, հանդէս եկած բազմաթիւ հեռուստանախագիծերու մէջ: 2001-ին «Հրէշը լուսնի վրայ» ներկայացման համար՝ ֆրանսական թատրոնին կողմէ՝ արժանացած է մրցանակի: