Պարտադիր Զինուորական Ծառայութենէն Խուսափած 9985 Քաղաքացի Ազատուած է Քրէական Հետապնդումէ
Հայաստանի մէջ սահմանուած կարգով վճարուած եւ քրէական հետապնդումէն ազատուած է 27 տարին լրացած պարտադիր զինուորական ծառայութենէն խուսափած 9985 քաղաքացի: «Արմենփրես»-ի գրաւոր հարցումին ի պատասխան տեղեկացուցած են ՀՀ պաշտպանութեան նախարարութենէն:
«Սահմանուած կարգի խախտումով պարտադիր զինուորական ծառայութիւն չանցած քաղաքացիներու մասին» ՀՀ օրէնքը ուժի մէջ մտնելէն ի վեր (2003-ի Դեկտեմբեր 17) սահմանուած կարգի խախտումով պարտադիր զինուորական ծառայութիւն չանցած քաղաքացիներուն դիմումները քննարկուող միջգերատեսչական յանձնաժողովը 9985 քաղաքացիի վերաբերեալ տուած է դրական որոշում:
Օրէնքին համաձայն` նշուած ժամանակահատուածին ՀՀ ՊՆ յատուկ հաշուեհամարին փոխանցուած է 11 միլիառ 81միլիոն 46 հազար դրամ:
Այդ գումարները կ՛օգտագործուին ռազմական կարիքները բաւարարելու համար` ՀՀ կառավարութեան սահմանուած կարգով: