Հայաստանի Հանրապետութեան Մէջ Զբօսաշրջիկներուն Թիւը Այս Տարի Աճած է 8,8 Տոկոսով
ՀՀ անցման կէտերով Հայաստան ներգնայ զբօսաշրջային այցելութիւններուն թիւը 2018 Յունուար-Սեպտեմբեր ամիսներուն աճած է 8,8 տոկոսով:
Ըստ Armenpress.am-ի՝ լրագրողներու հետ հանդիպման ընթացքին՝ ամփոփելով տարին՝ այս մասին ըսած է ՀՀ տնեսական զարգացման եւ ներդրումներու նախարարութեան զբօսաշրջութեան կոմիտէի նախագահ Հռիփսիմէ Գրիգորեան:
«Եթէ 2017-ին Հայաստան այցելած է 1 միլիոն 172 հազար 402 մարդ, 2018 թուականին՝ այցելուներուն թիւը կազմած է 1 միլիոն 275 հազար 209: Զբօսաշրջիկներէն 525 հազար 423-ը Հայաստան այցելած է Ռուսիոյ Դաշնութենէն»,- ըսած է ան:
Հռիփսիմէ Գրիգորեանի խօսքով` զբօսաշրջիկներու այցելութիւններու երկրորդ տեղը Վրաստանն է, ուրկէ Հայաստան ժամանած է 233 հազար 125 այցելու: Երրորդ տեղը Իրանն է` 132 հազար 839 այցելուով, չորրորդ տեղը ԱՄՆ-ն` 46 հազար 138 այցելուով եւ հինգերորդ տեղը` Ուքրանիան է` 24 հազար 308 այցելուով:
«2018 թուականի Յունուար-Սեպտեմբեր ամիսներուն կտրուկ աճ ապահոված երկիրները Հնդկաստանը, Չինաստանն ու Ղազախստանն են` համապատասխանաբար 131, 107 եւ 83 տոկոս»,- աւելցուցած է ան: