ՀՀԿ-ն Քաղաքապետի Թեկնածու Պիտի Չառաջադրէ
Երեւանի աւագանիի ընտրութիւններուն Հայաստանի Հանրապետական կուսակցութիւնը քաղաքապետի թեկնածու պիտի չառաջադրէ: Այս մասին` ըստ Panorama.am-ի՝ Օգոստոս 28-ին լրագրողներուն յայտնեց Ազգային Ժողովի փոխնախագահ Էդուարդ Շարմազանով:
Հարցումին, թէ ինչն է պատճառը, որ թեկնածու չեն առաջադրեր, ԱԺ փոխխօսնակը նշեց, որ չի կրնար պատճառներու մասին խօսիլ, կուսակցութիւնը այդպէս որոշած է:
«Գուցէ այսօր աւելի կարեւոր հարցեր կան Հայաստանի քաղաքական դաշտին մէջ, քան ՏԻՄ ընտրութիւններն են, բայց ես կը գտնեմ, որ իւրաքանչիւր քաղաքական ուժ պէտք է աշխոյժ մասնակցի բոլոր ընտրութիւններուն»,- ըսաւ ան` աւելցնելով, որ ատիկա իր անձնական կարծիքն է եւ միշտ չէ, որ իր կարծիքը կուսակցութեան մէջ մեծամասնութիւն է:
Դիտարկումին, երբ իրենց կուսակցութիւնը իշխանութիւն էր, ինք կը յորդորէր ընդդիմութեան մասնակցիլ ՏԻՄ ընտրութիւններուն, էդուարդ Շարմազանով նշեց, որ քաղաքական գործիչները իրադարձութեան փոփոխութեան պայմաններու մէջ կրնան իրենց կարծիքը փոխել:
Ան նաեւ նշեց, որ Երեւանի աւագանիի ընտրութիւններուն ՀՀԿ-ի չմասնակցիլը գուցէ պայմանաւորուած է շարք մը հանգամանքներով. «Նախ եւ առաջ անով, որ Հայաստանի մէջ այսօր հետիշխանափոխական իրավիճակ է, հիմնական թատերաբեմը Ազգային Ժողովն է եւ աւելի կարեւոր արտաքին եւ ներքին մարտահրաւէրներ կան Հայաստանի համար, քան ՏԻՄ ընտրութիւնները»:
Պատասխանելով Ազգայի Ժողովի ընտրութիւններուն մասնակցութեան մասին հարցումին` Էդուարդ Շարմազանով ըսաւ, որ երբ ընտրութիւններուն օրը որոշուի, այդ ժամանակ կը պատասխանէ: Ան միաժամանակ նշեց, որ եթէ կուսակցութիւն մը ԱԺ ընտրութիւններուն չմասնակցի, ապա այդ կուսակցութիւնը պէտք է մեծ կղպանք դնէ դրան վրայ եւ գրէ` «փակուած է»:
«Ես չեմ կարծեր, որ ՀՀԿ-ն ստեղծուած է անոր համար, որ թէկուզ իշխանափոխութենէն ետք չմասնակցի Ազգային ժողովի ընտրութիւններուն: Իմ խորին համոզումով, ՀՀԿ-ն դեռ շատ լուրջ ըսելիք ունի»,- ընդգծեց Շարմազանով: