Կը Վերականգնուի Կումայրի Պատմական Կեդրոնը
ՀՀ քաղաքաշինութեան կոմիտէի նախագահ Աւետիք Էլոյեան, Կոմիտէի նախագահի առաջին տեղակալ Արմէն Ղուլարեանի, Հայաստանի տարածքային զարգացման հիմնադրամի գործադիր տնօրէն Աշոտ Կիրակոսեանի հետ միասին այցելած է Գիւմրի՝ Կումայրի պատմական կեդրոնի զարգացման նախագիծի ծիրէն ներս տարուող ընթացիկ աշխատանքներուն ծանօթանալու նպատակով: Այս մասին կը տեղեկացնեն ՀՀ քաղաքաշինութեան պետական կոմիտէի մամուլի ծառայութենէն։
Գիւմրիի քաղաքապետարանին մէջ տեղի ունեցած խորհրդակցութեան ընթացքին քննարկուած են Կումայրի պատմական կեդրոնի վերակառուցման վերաբերող հարցեր: Քաղաքապետ Սամուէլ Բալասանեան վստահեցուցած է, որ այն հատուածները, որոնց շինարարութիւնը կ՝իրականացուի քաղաքապետարանի միջոցներով՝ պիտի աւարտին սահմանուած ժամկէտներու մէջ:
Այնուհետ շրջայց կատարուած է վերականգնուող պատմական թաղամասի տարածքին մէջ:
Այստեղ արդէն ամբողջութեամբ աւարտած են Ռուսթաւելի փողոցի վերականգնումն ու բարեկարգումը: Շիրազի եւ շրջակայ հատուածին գտնուող Ջիւանիի, Յակոբեան, Ղորղանեան, Աբովեան եւ Վարպետաց փողոցներուն մէջ եւս շինարարական աշխատանքներ սկսած են:
Կոմիտէի նախագահ Աւետիք Էլոյեան առանձնակի ուշադրութիւն հրաւիրած է ենթակառուցուածքներու վերատեղադրման ու նորերու կառուցման կարեւորութեան, որպէսզի անոնք խոչընդոտ չհանդիսանան յետագայ աշխատանքներուն: Ան դրական գնահատած է Ռուսթաւելի փողոցի վերականգնումը, շինաշխատանքներու ընթացքի, որակի եւ ժամկէտներու վերաբերեալ տալով յանձնարարականներ: