Ամերիկայի Հայ Աւետարանչական Ընկերակցութեան Հարիւրամեակին Առիթով՝ Հայ Աւետարանական Երիտասարդական Համաժողով Հայաստանի Մէջ
Ընթացիկ տարուան ամրան, Հայաստան պիտի դառնայ հաւատքի եւ ուխտի կեդրոն՝ աշխարհի զանազան կողմերէ հաւաքուող եւ Հայ Աւետարանական եկեղեցիները ու միութիւնները ներկայացնող առաւել քան 150 երիտասարդներու եւ առաջնորդներու համար: Ամերիկայի Հայ Աւետարանչական ընկերակցութեան հարիւրամեակին առիթով կազմակերպուած սոյն՝ Հայ աւետարանական երիտասարդական համաժողովը տեղի պիտի ունենայ Օգոստոս 12-16-ի միջեւ:
Աւելի քան 15 երկիրներ ներկայացնող այս երիտասարդները պիտի հաւաքուին հայրենիք, ոմանք՝ առաջին անգամ ըլլալով, իրարու հետ հաղորդակցելու իրենց մշակոյթով, ժառանգութեամբ եւ հայ քրիստոնեայ երիտասարդ ըլլալու ինքնագիտակցութեամբ: Անոնք պիտի այցելեն Երեւանի մէջ շարք մը տեսարժան վայրեր եւ պիտի ծանօթանան Աւետարանչականի կողմէ հայրենիքի մէջ ծաւալող կրթական ու բարեսիրական գործունէութիւններուն: Նաեւ, առիթը պիտի ունենան այցելելու Մայր Աթոռ Ս. Էջմիածին:
Խումբը ապա պիտի մասնակցի Աւետարանչականի «Շին-Շողիկ» ճամբարին մէջ կայանալիք չորսօրեայ համաժողովին, ուր պիտի ձգտին ծանօթանալ Հայ աւետարանական եկեղեցւոյ 172-ամեայ ժառանգութեան՝ գնահատելու եկեղեցւոյ ներկայ իրավիճակը եւ զարգացնելու իրենց միտքերը յառաջիկայ տասնամեակներու տեսլականով:
Վերջին հանգրուանով, համաժողովի մասնակիցները պիտի բաժնուին փոքրաթիւ խումբերու եւ մեկնին Հայաստանի մէջ քսան տարբեր ուղղութիւններով, ուր անոնք պիտի մասնակցին այլեւայլ ծառայական ծրագիրներու: Ոմանք պիտի ծառայեն մանուկներու հետ առնչուող ծրագիրներու, ուրիշներ պիտի կատարեն վերանորոգութեան եւ մաքրութեան աշխատանքներ, պիտի այցելեն դժուարութիւններ եւ կորուստներ դիմագրաւող ընտանքիներու՝ խրախուսելու համար զանոնք: Այս բոլորը՝ Քրիստոսի անաղարտ սիրոյ օրինակով եւ հայրենի մեր եղբայրները ու քոյրերը քաջալերելու նպատակով:
Մասնակցող երիտասարդները արդէն ոգեւորուած են հայրենիքը ճանչնալու այս փորձառութեամբ եւ հայրենիքին ի նպաստ իրենց համեստ մասնակցութիւնը բերելու: Անկասկա՛ծ, իրենց այս ջանքերով անոնք պիտի վերադառնան իրենց տուները եւ եկեղեցիները՝ ոգեշնչուած իրենց քրիստոնէական հաւատքով եւ աւելի խարսխուած իրենց ազգային ինքնութեան մէջ:
Ամերիկայի Հայ Աւետարանչական ընկերակցութիւնը հիմնադրուած է 1918-ին, Միացեալ Նահանգներու Մեսեչուսեց նահանգի Ուսթըր քաղաքը։ Անիկա երկնուեցաւ հայ ժողովուրդին ապրած ամենադժուար օրերուն, օգնելու համար մեր հայրենակիցներուն վերականգնելու իրենց կեանքը Ցեղասպանութեան եւ տեղահանութեան յաջորդող օրերուն: Աւետարանչականը դարձաւ համաշխարհային քրիստոնէական կազմակերպութիւն՝ թիկունք կանգ-նելով Հայ աւետարանական եկեղեցւոյ գործունէութիւններուն, սատարելով հայրենիքի եւ Սփիւռքի հայութեան հոգեւոր ու ֆիզիքական վերելքին, ինչպէս նաեւ այլոց, որոնք յատուկ կարիքներ ունին:
(Թղթակցութիւնը՝ Ամերիկայի
Հայ Աւետարանչական Ընկերակցութենէն)